Ադրբեջանը Լեռնային Ղարաբաղում էթնիկ զտումների ագրեսիվ քարոզչություն է իրականացնում. ԱԳՆ խոսնակ
Ադրբեջանը Լեռնային Ղարաբաղում էթնիկ զտումների ագրեսիվ քարոզչություն է իրականացնում. Այս մասին «Թվիթեր»-ի իր էջում գրել է ՀՀ ԱԳՆ մամուլի քարտուղար Անի Բադալյանը։
«Լեռնային Ղարաբաղի բնակչության իրավունքների և անվտանգության մասին խոսելու փոխարեն Ադրբեջանը շարունակում է էթնիկ զտումների իր ագրեսիվ քարոզչությունը. 2 տեսանյութ ԼՂ-ի դեմ «Վրեժ 3» նոր գործողության մասին պետական հեռուստատեսությամբ, առցանց հարցում, որտեղ 83%-ը «այո» են ասել», -գրել է ԱԳՆ մամուլի քարտուղարը։
Նա նշել է, որ սա թշնամանքի բացահայտ դրսևորում է, որը պարտադիր միջազգային դատապարտման և կանխարգելման կարիք ունի։
Հայաստանի Հանրապետությունը Լեռնային Ղարաբաղի հետ կապող Լաչինի միջանցքը շարունակում է փակ մնալ 2022 թվականի դեկտեմբերից։ Ապրիլի 23-ին Ադրբեջանը փակել է Լաչինի միջանցքի մուտքի Հաքարի գետի կամուրջը և անցակետ տեղադրել։ Ինչի հետևանքով Հայաստանի Հանրապետությունից կտրվել են ղարաբաղյան Եղցահող, Հին Շեն, Մեծ Շեն, Լիսագոր գյուղերը։
Հունիսի 15-ին Ադրբեջանն ամբողջությամբ արգելափակել է երթևեկությունը, այդ թվում՝ խաղաղապահների և ԿԽՄԿ-ի համար։ Հունիսի 23-ին Լաչինի միջանցքով վերականգնվել է երթևեկությունը՝ 10-օրյա ընդհանուր շրջափակումից հետո Լեռնային Ղարաբաղից Հայաստան հիվանդներին տեղափոխելու համար։
