Լեռնային Ղարաբաղից տեղահանվածները 1700 ստորագրությամբ հանձնագիր ներկայացրին Ֆրանսիայի դեսպանատուն
Լեռնային Ղարաբաղից տեղահանված անձինք այսօր՝ նոյեմբերի 15-ին պետիցիա (հանձնագիր) են ներկայացրել Ֆրանսիայի դեսպանություն՝ ի պաշտպանություն Ադրբեջանի դեմ պատժամիջոցներ կիրառելու մասին Ֆրանսիայի Սենատի բանաձևի, որը կքննարկվի այսօր:
«Հանուն Հադրութի» ՀԿ ղեկավար Լևոն Հայրիյանը նշեց, որ հանձնագրի տակ ստորագրել է ավելի քան 1700 քաղաքացի։
«Մենք՝ ԼՂՀ-ի և Հայաստանի ներքոստորագրյալ քաղաքացիներս, մեր երախտագիտությունն ենք հայտնում Ֆրանսիայի Սենատին, երկրի քաղաքական ուժերին և անձամբ Ֆրանսիայի նախագահ Էմանուել Մակրոնին՝ ղարաբաղյան հիմնախնդրի կարգավորման վերաբերյալ իրենց դիրքորոշման համար… Հուսով ենք, որ այս նախաձեռնությունը վերջինը չի լինի, մանավանդ որ դա է պահանջում տարածաշրջանում ստեղված իրավիճակը: Մենք վստահ ենք, որ Ֆրանսիայի Սենատի բանաձևը ամուր հիմք կդառնա ղարաբաղյան հիմնախնդրի արդարացի կարգավորման համար»,- ասված է հանձնագրում։
Հայրիյանը նշեց նաև, որ հնարավոր է՝ նոյեմբերի 16-ին նամակը հանձնեն նաև ԱՄՆ դեսպանություն:
Ավելի վաղ տեղեկացրել էինք, որ Ֆրանսիայի Սենատը նոյեմբերի 15-ի նիստում կքննարկի Ադրբեջանի դեմ պատժամիջոցների մասին բանաձևը։
