ՔՊ-ի ԱԺ նախագահի թեկնածուն Ալեն Սիմոնյանն է
«Քաղաքացիական պայմանագիր» կուսակցության Ազգային ժողովի նախագահի թեկնածուն Ալեն Սիմոնյանն է: Այս մասին «Ազատություն» ռադիոկայանին տված հարցազրույցում նշել է «Իմ քայլը» խմբակցության պատգամավոր Հրաչյա Հակոբյանը:
«Այո, շրջանառվում են նաև փոխնախագահների անուններ՝ Հակոբ Արշակյանի և Ռուբեն Ռուբինյանը, դա նույնպես համապատասխանում է իրականությանը:
Հարցին, թե ինչպես է որոշվել, որ ԱԺ նախագահ պետք է լինի Ալեն Սիմոնյանը, Հրաչյա Հակոբյանը պատասխանեց. «Ինչպես գիտեք, մեր կուսակցությունում շատ բուռն քննարկումներ են տեղի ունենում: Չգիտեմ՝ ինքնառաջադրվել էր, թե ինչ-որ մեկն առաջադրել է, բայց քննարկումների արդյունքում կուսակցությունն ընդունեց որոշում, որ Ալեն Սիմոնյանը պետք է լինի ԱԺ նախագահի մեր թեկնածուն»:
Հակոբյանը նաև նշեց․ « Քննարկումներ կան, թե ովքեր պետք է լինեն գործադիրում, բայց կոնկրետ ով որտեղ, այս պահի դրությամբ չեմ կարող ասել»,-ասաց նա:
Հարցին, թե Արարատ Միրզոյանի անունը ևս շոշափվո՞ւմ է գործադիր մարմնում պաշտոն զբաղեցնողների շարքում, պատգամավորը պատասխանեց. «Տեղեկություն չունեմ Արարատ Միրզոյանի վերաբերյալ, բայց քննարկումները, այո բնականաբար արդեն սկսվել են, թե ցուցակի որ համարը պետք է մնա պատգամավոր և ովքեր պետք է գնան գործադիր մարմնում աշխատելու:
Ավարտել ենք այդ քննարկումները: Դրանք մեծ հաշվով տեղի են ունեցել վարչության կազմով: Ես վարչության անդամ չեմ, շատ մանրամասներին չեմ տիրապետում»:
