Լավրովը հայտարարել է, որ ԱՄՆ-ը փորձում է Ռուսաստանին դուրս մղել էներգետիկ շուկաներից
Ռուսաստանի արտգործնախարար Սերգեյ Լավրովը հայտարարել է, որ ԱՄՆ-ը փորձում է ռուսական ընկերություններին դուրս մղել տարբեր երկրների էներգետիկ շուկաներից։ Որպես օրինակ նա բերել է Սերբիայի խոշորագույն նավթային ընկերություններից մեկի՝ «NIS»-ի շուրջ ստեղծված իրավիճակը։ Այս մասին հայտնել է «ՏԱՍՍ»-ը։
«NIS»-ը սերբական նավթային ընկերություն է, որի խոշոր բաժնետերը ռուսական «Գազպրոմ նեֆտ»-ն է։ Ընկերությունը հայտնվել է ԱՄՆ պատժամիջոցների տակ։ Դրանց հետևանքով առաջացել է ռուսական բաժնեմասը վաճառելու անհրաժեշտություն։
Հոկտեմբերին Սերբիայի փոխվարչապետ Սինիշա Մալին հայտնել էր, որ պայմանավորվածություն է ձեռք բերվել «NIS»-ի բաժնետոմսերի 56.15 տոկոսը հունգարական «MOL» ընկերությանը վաճառելու շուրջ։ Այդ բաժնեմասը պատկանում է «Գազպրոմ նեֆտ»-ին։ Գործարքը դեռ պետք է հաստատեն Սերբիայի, Բոսնիա և Հերցեգովինայի համապատասխան մարմինները և ԱՄՆ իշխանությունները։
Լավրովի պնդմամբ՝ այս գործընթացը ցույց է տալիս, որ Վաշինգտոնը փորձում է վերահսկողություն հաստատել համաշխարհային էներգետիկ շուկաների նկատմամբ։ Նա նաև հիշատակել է Վենեսուելայի նավթային ոլորտը՝ նշելով, որ ԱՄՆ-ը հայտարարել է դրա նկատմամբ վերահսկողություն հաստատելու մասին։

