Իսրայելի ընտրություններում Նեթանյահուն առաջատար է, սակայն մեծամասնություն չունի
Իսրայելի խորհրդարանական ընտրությունների նախնական արդյունքներով՝ Բենիամին Նեթանյահուի «Լիկուդ» կուսակցությունն ու նրա աջակողմյան և ծայրահեղ ուղղափառ դաշնակիցները կարող են ստանալ Քնեսեթի 120 մանդատներից 53-ը։ Գադի Այզենկոտի գլխավորած ընդդիմադիր դաշինքը, ըստ նախնական տվյալների, կարող է ստանալ 48 մանդատ։
Քվեաթերթիկների 85 տոկոսի հաշվարկից հետո Նեթանյահուն առաջատար է, սակայն կառավարություն ձևավորելու համար անհրաժեշտ 61 մանդատը դեռ ապահովված չէ։ Արաբական կուսակցությունները կարող են ստանալ ռեկորդային՝ 19 մանդատ և վճռորոշ դեր ունենալ կոալիցիոն բանակցություններում, թեև հրեական կուսակցությունների մեծ մասը դեմ է նրանց հետ համագործակցությանը։
Դեռևս հաշվարկված չեն 430-480 հազար քվեաթերթիկներ, ուստի վերջնական արդյունքները կարող են հրապարակվել մեկ կամ երկու օրվա ընթացքում։ Իսրայելի նախագահ Իցհակ Հերցոգը հայտարարել է, որ պաշտոնական արդյունքները ստանալուց հետո խորհրդակցություններ կանցկացնի քաղաքական ուժերի հետ և կառավարություն ձևավորելու մանդատ կտա այն առաջնորդին, որն իր գնահատմամբ՝ հաջողության հասնելու առավել մեծ հնարավորություն կունենա։
Նեթանյահուն կոչ է արել ձևավորել ուժեղ աջակողմյան ազգային կառավարություն, մինչդեռ Այզենկոտը հայտարարել է, որ ընտրողները քվեարկել են փոփոխությունների օգտին։ Ընդդիմության ներսում, սակայն, տարաձայնություններ կան արաբական կուսակցությունների հետ հնարավոր համագործակցության հարցում։ Եթե քաղաքական ուժերը չկարողանան ապահովել անհրաժեշտ խորհրդարանական մեծամասնությունը, Իսրայելում կարող են անցկացվել նոր ընտրություններ։
Նշենք, որ Քնեսետի ընտրություններն առաջինն էին 2023 թվականի հոկտեմբերի 7-ի ՀԱՄԱՍ-ի հարձակումից և դրան հաջորդած պատերազմներից հետո։
