Թրամփը կարգադրել է հանել ռուսական դիզվառելիքի նկատմամբ պատժամիջոցները․ Ռուբիո
ԱՄՆ նախագահ Դոնալդ Թրամփը կարգադրել է հանել ռուսական դիզելային վառելիքի նկատմամբ սահմանված պատժամիջոցները, քանի որ դա բխում է Վաշինգտոնի շահերից։ Այս մասին հայտարարել է ԱՄՆ պետքարտուղար Մարկո Ռուբիոն։
«Սա ձեռնտու կլինի ինչպես Միացյալ Նահանգներին, այնպես էլ այլ երկրներին։ Նախագահն այս որոշումը կայացրել է ոչ թե նրա համար, որ այն ձեռնտու է Ուկրաինային կամ Ռուսաստանին, այլ որովհետև այն օգտակար է Ամերիկայի համար և կարևոր է Ամերիկայի համար»,- ասել է նա։
ԱՄՆ պետքարտուղարն ընդգծել է, որ դիզելային վառելիքի համաշխարհային պահանջարկն աճել է, և նշել, որ Միացյալ Նահանգները նախկինում ևս կիրառել է նմանատիպ միջոց՝ կապված ռուսական վառելիքի հետ։ «Նախագահը որոշել է կրկնել այս քայլը և 30-օրյա մորատորիում սահմանել պատժամիջոցների նկատմամբ՝ թույլ տալով ավելացնել ռուսական դիզելային վառելիքի մատակարարումը համաշխարհային շուկա», – հայտարարել է նա։
Ռուբիոն նաև նշել է, որ Միացյալ Նահանգները կարծում է, թե Ուկրաինայում հակամարտությունը պետք է կարգավորվի դիվանագիտական ճանապարհով։ Միաժամանակ, նա ընդունել է, որ ներկայումս դրան հասնելը դժվար է։ «Իրավիճակն այսպիսին է. այն բարդ է քննարկել բանակցություններում և դժվար է լուծել։ Միացյալ Նահանգները պատրաստ է և ունակ հանդես գալ որպես միջնորդ, եթե հնարավորություն ստեղծվի ավարտելու այս պատերազմը բանակցությունների միջոցով, ինչը, մեր կարծիքով, այն ճանապարհն է, որով ի վերջո կավարտվի այս պատերազմը», – կարծիք է հայտնել ԱՄՆ պետքարտուղարը։
Ռուբիոն շեշտել է, որ ԱՄՆ-ը կշարունակի ջանքեր գործադրել հնարավոր լուծումներ գտնելու ուղղությամբ՝ միաժամանակ նշելով, որ Վաշինգտոնն ունի նաև արտաքին քաղաքական այլ առաջնահերթություններ։
