Իսպանիան զորքեր է ուղարկում Սեուտա՝ միգրանտների զանգվածային հոսքի ֆոնին
Իսպանիան զորքեր է տեղակայում իր հյուսիսաֆրիկյան Սեուտա անկլավում՝ անվտանգությունն ուժեղացնելու նպատակով, այն բանից հետո, երբ հազարավոր միգրանտներ Մարոկկոյից լողալով հատել են սահմանը։
BBC-ի փոխանցմամբ՝ Սեուտա հասնելու փորձի ընթացքում առնվազն 15 մարդ խեղդվել է, իսկ տեղական իշխանությունները Մադրիդից օգնություն են խնդրել սահմանախախտումների կտրուկ աճի պատճառով։
Իսպանիայի ներքին գործերի նախարարությունը անօրինական միգրանտների հոսքի աճի համար մեղադրել է մարդկանց թրաֆիկինգով զբաղվող ցանցերին։ Մարոկկոյի հյուսիսային ափին գտնվող Սեուտան, որը Ջիբրալթարի նեղուցով բաժանված է մայրցամաքային Իսպանիայից, վաղուց համարվում է Եվրոպա հասնելու փորձ կատարող միգրանտների հիմնական ուղղություններից մեկը։
Վերջին օրերին միգրանտների հոսքը շարունակաբար աճել է, իսկ հինգշաբթի հազարավոր մարդիկ ծովով շրջանցել են սահմանային նավամատույցը։ Իսպանական կողմում լողափերը ծածկվել են փրկօղակներով, մինչդեռ տասնյակից ավելի մարդիկ խեղդվել են անցման փորձի ժամանակ։ Միայն մեկ օրում Սեուտա է մուտք գործել շուրջ 2000–3000 մարդ, թեև պաշտոնական հաստատում դեռևս չկա։
