Ռուսաստանը չի ճանաչում մեր ինքնիշխանությունը տարածքի 20 տոկոսի նկատմամբ, իսկ տիկին Կալլասը՝ 100 տոկոսի նկատմամբ. Կոբախիձե
Եթե Ռուսաստանը չի ճանաչում Վրաստանի ինքնիշխանությունը նրա տարածքի 20 տոկոսի նկատմամբ, ապա տիկին Կայա Կալլասը չի ճանաչում Վրաստանի ինքնիշխանությունը նրա տարածքի 100 տոկոսի նկատմամբ։ Սա լիովին ամոթալի վերաբերմունք է։
Այս մասին ճեպազրույցի ժամանակ հայտարարել է Վրաստանի վարչապետ Իրակլի Կոբախիձեն՝ մեկնաբանելով Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասի այսօրվա հայտարարությունը։
Նա Վրաստանի ժողովրդի կամքի չճանաչումն ու դրան հակազդելը Եվրամիության բարձրագույն ներկայացուցչի կողմից անվանել է չափազանց լուրջ և ամոթալի երևույթ։
Նշենք, որ Կայա Կալլասը Բրյուսելում լրագրողների հետ զրույցում հայտարարել էր, որ ԵՄ-ն ցանկանում է աջակցել ոչ թե Վրաստանի կառավարությանը, այլ վրաց ժողովրդին:
