Հայաստանը ստիպված կլինի լրացուցիչ 1 միլիարդ դոլար գտնել գազի գնումների համար․ ՌԴ ԱԽ
ՌԴ Անվտանգության խորհրդի քարտուղարի տեղակալ Ալեքսանդր Շևցովը «Վեստի» լրատվական գործակալությանը հայտնել է, որ եթե ՀՀ-ն անցնի շուկայական գներին, հավանաբար, ստիպված կլինի գտնել լրացուցիչ մոտ 1 միլիարդ դոլար գազի գնումների համար։
Նա նշել է, որ ՀՀ-ն այժմ ռուսական գազ է ստանում 177,50 դոլարով հազար խորանարդ մետրի համար։ Միևնույն ժամանակ, վառելիքի գինը բորսայական շուկաներում ներկայումս կազմում է մոտ 600 դոլար և որոշ դեպքերում կարող է հասնել մինչև 800 դոլարի հազար խորանարդ մետրի համար։
Շևցովի խոսքով, Ռուսաստանից Հայաստան գազի մատակարարման տարեկան ծավալը կազմում է մոտ 2,3 միլիարդ խորանարդ մետր։
«Բորսայի գինը, ինչպես արդեն քննարկել ենք առաջին հարցման մեջ, կազմում է մոտ 600 դոլար և կարող է հասնել 800 դոլարի։ Եվ հաշվի առնելով, որ Հայաստանը Ռուսաստանից ստանում է 2,3 միլիարդ խորանարդ մետր, պարզ հաշվարկը ցույց է տալիս, որ Հայաստանը ստիպված կլինի գտնել լրացուցիչ 1 միլիարդ դոլար, և գուցե նույնիսկ ավելին», – նշել է նա։
