Թրամփը Եվրոպային խորհուրդ է տվել կենտրոնանալ ուկրաինական հակամարտության, այլ ոչ թե Գրենլանդիայի վրա
ԱՄՆ նախագահ Դոնալդ Թրամփը եվրոպական երկրներին խորհուրդ է տվել իրենց ուշադրությունը սևեռել ոչ թե Գրենլանդիայի, այլ Ռուսաստանի և Ուկրաինայի միջև հակամարտության կարգավորման վրա։ «Արմենպրես»-ի հաղորդմամբ՝ այս մասին հայտնում է NBC News-ը։
«Եվրոպան պետք է կենտրոնանա Ռուսաստանի և Ուկրաինայի միջև պատերազմի վրա։ Ահա, թե ինչի վրա պետք է կենտրոնանա Եվրոպան, այլ ոչ թե Գրենլանդիայի»,- հայտարարել է նա։
Դոնալդ Թրամփը նաև վերահաստատել է եվրոպական երկրների նկատմամբ լրացուցիչ մաքսատուրքեր սահմանելու իր մտադրությունը՝ Գրենլանդիայի վերաբերյալ համաձայնության չհանգելու դեպքում։ Դրա վերաբերյալ հարցին ԱՄՆ նախագահը պատասխանել է. «100% այո»։
Միաժամանակ, ԱՄՆ նախագահը չի արձագանքել այն հարցին, թե արդյոք ուժ կկիրառի Գրենլանդիան Միացյալ Նահանգներին միացնելու համար։
ԱՄՆ նախագահն ավելի վաղ հայտարարել էր, որ փետրվարից մաքսատուրքեր է սահմանելու այն եվրոպական երկրների նկատմամբ, որոնք Գրենլանդիայի հարցում դեմ են իր դիրքորոշմանը։ Նա նաև դժգոհել էր այն հանգամանքից, որ որոշ երկրներ սկսել են ուժեր տեղակայել Գրենլանդիայում։
Թրամփը բազմիցս հայտարարել է Գրենլանդիան ԱՄՆ-ին միացնելու մտադրության մասին՝ դա համարելով ազգային անվտանգության համար կարևոր խնդիր։ Մինչդեռ Գրենլանդիայի և Դանիայի իշխանությունները բազմիցս հրապարակայնորեն դեմ են արտահայտվել ԱՄՆ վարչակազմի այդ ծրագրին։
