Իսրայելի պաշտպանության նախարարը բացատրել է, թե ինչու չհաջողվեց սպանել Իրանի գերագույն առաջնորդին
Իսրայելը կսպաներ Իրանի գերագույն առաջնորդ այաթոլլա Ալի Խամենեիին, եթե դա հնարավոր լիներ երկրների միջև 12-օրյա պատերազմի ընթացքում, հինգշաբթի հայտարարել է Իսրայելի պաշտպանության նախարար Իսրայել Կացը, հաղորդում է Reuters-ը։
«Ես կարծում եմ, որ եթե Խամենեին մեր տեսադաշտում լիներ, մենք նրան կվերացնեինք», – ասել է Կացը իսրայելական հանրային հեռարձակող Kan-ին։
«Սակայն Խամենեին հասկացավ դա, շատ խորը մտավ ընդհատակ և խզեց կապերը վերացված հրամանատարներին փոխարինող հրամանատարների հետ, ուստի, ի վերջո, դա անիրատեսական էր», – ասել է նա։
Իսրայելը սպանել է մի քանի բարձրաստիճան իրանցի զինվորական հրամանատարների և միջուկային գիտնականների Իրանի դեմ պատերազմի սկզբում։
Իսրայելի վարչապետ Բենիամին Նեթանյահուն և ԱՄՆ նախագահ Դոնալդ Թրամփը պատերազմի ընթացքում տարբեր ժամանակներում ենթադրել են, որ Խամենեիի կյանքը կարող է վտանգի տակ լինել, քանի որ պատերազմը, որն ավարտվեց ԱՄՆ-ի միջնորդությամբ կնքված հրադադարով, կարող է հանգեցնել «ռեժիմի փոփոխության»։
