Միջուկային աղետի եզրին ենք. Նեբենզյան` Իրանին Իսրայելի հարվածների մասին

Մերձավոր Արևելքում ծայրահեղ վտանգավոր սրացում տեղի է ունենում Իսրայելի գործողությունների պատճառով։ Այս մասին Իրանի խնդրանքով հրավիրված ՄԱԿ ԱԽ հրատապ նիստում հայտարարել է ՄԱԿ-ում Ռուսաստանի մշտական ներկայացուցիչ Վասիլի Նեբենզյան:

Ավելի վաղ Իրանի Իսլամական հեղափոխության պահապանների կորպուսը (ԻՀՊԿ) հայտարարել էր, որ Իրանն ի պատասխան Իսրայելի հարվածների` իրականացնում է «Ճշմարիտ խոստում 3» գործողությունը: Իրանի պատասխան գործողությունների մասին տեղեկությունը հայտնվել էր Իրանի գերագույն առաջնորդ Ալի Խամենեիի՝ իրանցիներին ուղղված ուղերձից հետո, որտեղ նա խոստանում էր Իսրայելին ուժով պատասխանել:

«Մեր աչքի առաջ Իսրայելի գործողությունների պատճառով ծայրահեղ վտանգավոր սրացում է տեղի ունենում մերձավորարևելյան տարածաշրջանում, որը պահանջում է խորհրդի անհետաձգելի ուշադրությունը»,-ասել է Նեբենզյան։

Նա հավելել է, որ Իրանի դեմ Իսրայելի հարձակումը տարածաշրջանը տանում է դեպի «լայնածավալ միջուկային աղետի»:

«Ուզում ենք ցավակցություն հայտնել Իրանի Իսլամական Հանրապետության ղեկավարությանը և ժողովրդին՝ բազմաթիվ մարդկային զոհերի կապակցությամբ, այդ թվում՝ խաղաղ բնակիչների շրջանում»,-նշել է ռուս դիվանագետը։

Հիշեցնենք` հունիսի 13-ի վաղ առավոտյան Իսրայելի պաշտպանության բանակը (ՑԱԽԱԼ) Իրանի դեմ լայնածավալ գործողություն է սկսել, թիրախները եղել են Թեհրանում, Թավրիզում, Սպահանում, Իլամում։ Հարձակման է ենթարկվել Նաթանզի միջուկային օբյեկտը։

Իսրայելի իշխանությունները հայտարարել են, որ գործողության նպատակն է կանխել հրեական պետության գոյությանը սպառնացող վտանգը, քանի որ, իսրայելցի զինվորականների և հետախուզության տվյալներով, Իրանը կարճ ժամանակում միջուկային զենք ստեղծելու հարցում անդառնալի կետի է մոտեցել։

Հարվածների հետևանքով զոհվել է 6 միջուկային ֆիզիկոս, այդ թվում` Մոհամմադ Մեհդի Թեհրանչին և Իրանի ատոմային էներգիայի կազմակերպության նախկին ղեկավար Ֆերեյդուն Աբբասին։

Սպանվել են նաև 4 բարձրաստիճան գեներալներ՝ Իսլամական հեղափոխության պահապանների կորպուսի (ԻՀՊԿ) գլխավոր հրամանատար Ալի Հաջիզադեն, Իրանի ԶՈւ գլխավոր շտաբի պետ Մոհամմադ Բաղերին, ԻՀՊԿ կենտրոնական շտաբի հրամանատար Գոլամ Ալի Ռաշիդը և ԻՀՊԿ հրամանատար Հոսեյն Սալամին:

Իրանի գերագույն առաջնորդ այաթոլլա Ալի Խամենեին երկրի քաղաքացիներին ուղղված իր ուղերձում Իսրայելի կողմից Իրանի վրա հարվածները հանցագործություն է որակել։ Նա հայտարարել է, որ Իսրայելին դառը և սարսափելի ճակատագիր է սպասում։

Թեհրանը ՄԱԿ-ի անվտանգության խորհրդի արտակարգ նիստ է խնդրել՝ կապված Իսրայելի կողմից Իրանին հասցված հարվածների հետ։