Ալեն Սիմոնյանն անձամբ է դիմավորելու Վալենտինա Մատվիենկոյին
ԱԺ նախագահ Ալեն Սիմոնյանն անձամբ է դիմավորելու Ռուսաստանի Դաշնային ժողովի Դաշնության խորհրդի նախագահ Վալենտինա Մատվիենկոյին օդանավակայանում: Այս մասին նա ասաց լրագրողներին` պատասխանելով հարցին, թե ինչու էր Լավրովին դիմավորում փոխարտգործնախարարը։
Նրա խոսքով` պրոտոկոլով նախատեսված է, որ, ասենք` ԱԺ խոսնակին դիմավորում է փոխխոսնակը, բայց, ընդհանուր առմամբ` ինքը կին գործընկերների համար բացառություն է անում։
Անդրադառնալով այն հարցին, թե ՔՊ-ում հակասություններ կան, որովհետև Արարատ Միրզոյանի` ՌԴ-ի հանդեպ տեսակետը տարբերվում է Ալեն Սիմոնյանի տեսակետից, նա ասաց.
«Միրզոյանը դիվանագիտական կառույցի ղեկավարն է, ու նա կարող է իր արտահայտություններում լինել շատ ավելի դիվանագետ, ավելի զսպված։ Իսկ ես ամենամեծ քաղաքական կառույցի ղեկավարն եմ, պատգամավոր եմ, ես քաղաքական արտահայտություններ անելու ազատություն ունեմ և, իմ բնավորությանը բնորոշ, ավելի կտրուկ եմ»։
