Շոլցը բացել է ճամպրուկի գաղտնիքը, որով եկել է Կիև

Սոցցանցերի օգտատերերը և լրագրողներն ուշադրություն էին դարձրել այն բանին, որ Գերմանիայի կանցլեր Օլաֆ Շոլցը Կիև է եկել Rimowa մակնիշի արծաթավուն ճամպրուկով, և սկսել են մտածել, թե ինչ կարող է լինել դրանում, փոխանցում է ՏԱՍՍ-ը։

Սոցցանցերում բազմաթիվ կատակներ են արվել։ Ինչպես նշել է NTV հեռուստաալիքը, ոմանք ենթադրել են, որ դրանում սուրճով թերմոս է և բուտերբրոդներ։ Մյուսները կատակել են, որ  ճամպրուկում զենքեր են Ուկրաինայի համար՝ 650 մլն եվրո արժողությամբ, որոնց առաքման մասին ավելի վաղ հայտնել էր կանցլերը, կամ էլ պարզապես սև պորտֆել, որը Շոլցը սիրում է կրել իր հետ։ Օգտատերերը նաև չեն բացառել, որ կանցլերն իր հետ դատարկ ճամպրուկ է բերել, որպեսզի ինչ-որ բան վերցնի Կիևից։

Զելենսկու հետ համատեղ մամուլի ասուլիսում լրագրողուհիներից մեկը Շոլցին հարցրել է, թե ինչ կա ճամպրուկում։ «Որքա՞ն մանրամասն եք ցանկանում իմանալ»,- հարցրել է կանցլերն ի պատասխան և ասել, որ «մեծ մասամբ խոսքը ճամփորդական իրերի մասին է, ներքնազգեստի և էլի մի քանի բաների, որոնք պետք են»։