Վարդենիսում տարեցների ցերեկային խնամքի կենտրոն է բացվել
Գեղարքունիքի մարզի Վարդենիս համայնքում բացվել է տարեցների խնամքի կենտրոն։ Այս մասին տեղեկանում ենք համայնքապետարանի ֆեյսբուքյան էջից։
Կենտրոնի բացմանը ներկա էին Վարդենիսի համայնքապետարանի ղեկավար կազմը՝ Համայնքի ղեկավար Ահարոն Խաչատրյանի գլխավորությամբ, «Կամրջակ» ՍԲՀԿ-ի նախագահ Մարիա Գորիսը, Վարդենիսի հոգևոր հովիվ տեր Հարություն քհն. Հունանյանը և այլք։
«Մեր տատիկ-պապիկների համար շատ կարևոր է շփումը և դրական վերաբերմունքը, ամենօրյա խնամքն ու ուշադրությունը: Վարդենիս համայնքի տարեցների ժամանցային ցերեկային կենտրոնում ստեղծվել է բարեկարգ և հարմարավետ միջավայր, առողջ մթնոլորտ՝ միմյանց հետ շփվելու և ժամանցը լիարժեք կազմակերպելու համար: Սա ևս մեկ քայլ է՝ ուշադրություն դարձնելու տարեցների խնդիրներին և ջանքեր գործադրելու, որպեսզի նրանք ապրեն արժանավայել կյանքով, շրջապատված լինեն հոգատարությամբ և կրկին հնարավորություն է ընձեռվում հարգանքի արժանացնել այն մարդկանց, ովքեր վաստակել են արժանապատիվ ծերության իրավունքը և առիթ՝ անդրադառնալու տարեց մարդկանց խնդիրներին ու գտնելու դրանց լուծման ուղիները»,- ասել է Վարդենիս համայնքի ղեկավար Ահարոն Խաչատրյանը։
Տեր Հարություն քահանա Հունանյանը կատարել է կենտրոնի օրհնության կարգ։
