Վաղարշակ Հարությունյանը Գալուզինին փոխանցել է ՀՀ մտահոգությունները Ադրբեջանի հայտարարությունների վերաբերյալ

Ռուսաստանի Դաշնությունում Հայաստանի Հանրապետության արտակարգ և լիազոր դեսպանի հանդիպումը ՌԴ արտաքին գործերի նախարարի տեղակալի հետ։ Հունվարի 17-ին հայկական կողմի նախաձեռնությամբ Ռուսաստանի Դաշնության արտաքին գործերի նախարարի տեղակալ Միխայիլ Գալուզինն ընդունեց ՌԴ-ում ՀՀ արտակարգ և լիազոր դեսպան Վաղարշակ Հարությունյանին։ Հանդիպման ընթացքում մտքեր փոխանակվեցին տարածաշրջանային անվտանգությանը վերաբերող հարցերի շուրջ:

Դեսպան Հարությունյանը զրուցակցին ներկայացրեց Հայաստանի և Ադրբեջանի միջև հարաբերությունների կարգավորման գործընթացում վերջին զարգացումները` մտահոգություն հայտնելով պաշտոնական Բաքվի վերջին հայտարարությունների վերաբերյալ: Դեսպանն ընդգծեց ՀՀ դիրքորոշման հիմքում դրված հիմնարար սկզբունքները՝ տարածքային ամբողջականության փոխադարձ հարգման, ԽՍՀՄ ամենավերջին քարտեզների հիման վրա սահմանազատման գործընթացի ապահովման և ինքնիշխանության ու իրավազորության ներքո, հավասարության, փոխադարձության սկզբունքներով տարածաշրջանային կապուղիների ապաշրջափակման վերաբերյալ: