Պայթյուններ Կիևում
Կիևում դեկտեմբերի 11-ին մի շարք պայթյուններ են տեղի ունեցել, որից հետո օդային ռմբակոծության մասին ահազանգ է հայտարարվել, հայտնում է ՈՒՆԻԱՆ-ը։
ՀՕՊ աշխատանքների արդյունքում ենթադրաբար բեկորներ են ընկել Դարնիցկի և Գոլոսեևսկի շրջաններում։
Քաղաքապետ Վիտալի Կլիչկոյի խոսքով՝ հրթիռի բեկորը վնասել է Դարնիցկի թաղամասի անավարտ շինությունը։ Հերթական բեկորն ընկել է գազոնի վրա:
«Նաև Դարնիցկի թաղամասում այժմ երկու վիրավոր կա՝ տղամարդ և կին։ Նրանց տեղում բուժօգնություն են ցուցաբերել բժիշկները»,- պարզաբանել է նա։
Քիչ անց Կլիչկոն հայտնել է չորս վիրավորի մասին։ «Չորս մարդ՝ բոլորը մեծահասակներ, վիրավորվել են Դարնիցկի շրջանում՝ հակառակորդի հրթիռային հարձակման հետևանքով։ Բժիշկները նրանց տեղում օգնություն են ցուցաբերել»,- ասված է քաղաքապետի հաղորդագրության մեջ։
Նրա խոսքով՝ հրթիռի բեկոր է հայտնաբերվել նաև Դառնիցկի թաղամասի պահեստի խանութի տարածքում։ Շենքում հրդեհ կամ վնաս չի եղել։
Ռազմաօդային ուժերը հայտնել են, որ դեկտեմբերի 11-ի առավոտյան ժամը մոտավորապես չորսին ՌԴ զինված ուժերը հրթիռային հարված են հասցրել Կիևի շրջանին։ Ընդհանուր առմամբ, հակաօդային պաշտպանությունը ոչնչացրել է ութ օդային թիրախ, որոնք բալիստիկ հետագծով թռչում էին դեպի մայրաքաղաք։
