Իրանը Ռուսաստանի դեսպանին բողոք է հայտնել
Իրանի արտգործնախարարն անդրադարձել է հուլիսի 10-ին Ռուսաստանի և Պարսից Ծոցի արաբական պետությունների համագործակցության խորհրդի ռազմավարական երկխոսության նախարարական հանդիպման ավարտին ընդունված համատեղ հայտարարությանը, որում, իրանական կողմի տվյալով, Հանրապետության տարածքային ամբողջականությանը հակասող վիճահարույց հայտարարություններ են արվել:
Խոսքը Պարսից ծոցի 3 կղզու մասին է, որոնց պատկանելությունը վիճարկում են Արաբական Միացյալ Էմիրությունները և Իրանը։ Թեհրանը Ռուսաստանի դեսպանին բողոք էր հայտնել, վերջինս էլ հավատացրել էր, որ Մոսկվան հարգում է Իրանի տարածքային ամբողջականությունը:
Հոսեյն Ամիր Աբդոլլահիանը նշել է՝ Թեհրանը բավարար չի համարում ռուսական կողմի բացատրությունը, միաժամանակ հույս ունի, որ նման միջադեպեր այլևս չեն կրկնվի:
«Մենք հարգում ենք բոլոր երկրների տարածքային ամբողջականությանը, այդ թվում՝ Ուկրաինայինը: Բոլորը պետք է առաջնորդվեն միջազգային իրավունքուվ: Իսկ պատերազմները պետք է կարգավորվեն քաղաքական երկխոսության միջոցով»,- ամփոփել է իրանցի դիվանագետը:
