Հայաստանը կարող է մինչև օգոստոսի 21-ը ՄԱԿ դատարան ներկայացնել հակափաստարկներ Ադրբեջանի հայցի վերաբերյալ
Հայաստանը կարող է մինչև օգոստոսի 21-ը ՄԱԿ միջազգային դատարան ներկայացնել հակափաստարկներ Ադրբեջանի հայցի վերաբերյալ։ Այս մասին նշվել է դատարանի պաշտոնական հաղորդագրությունում։
Ապրիլի 21-ին Ադրբեջանը գործի վերաբերյալ նախնական առարկություններ է ներկայացրել։ Դրանից հետո, դատարանի կանոնադրության համաձայն, գործի ըստ էության քննությունը դադարեցվել է ընդհուպ մինչև այն պահը, երբ Հայաստանը կներկայացնի իր հակափաստարկներն Ադրբեջանի առարկությունների վերաբերյալ։ Դրանից հետո դատարանը պետք է սկզբում քննի կողմերի վիճաբանությունները, իսկ հետո շարունակի հայցի ըստ էության լսումները։
Այս փուլը կարող է տևել մինչև 4 ամիս, այսինքն՝ Հայաստանը պետք է ներկայացնի իր նկատառումները Ադրբեջանի առարկությունների մասին մինչև օգոստոսի 21-ը։
Հիշեցնենք, որ ՄԱԿ միջազգային դատարանը փետրվարի 22-ին բավարարել էր Հայաստանի միջնորդությունը ժամանակավոր միջոցի կիրառման մասին և պարտավորեցրել Ադրբեջանին ապահովել քաղաքացիների, տրանսպորտի և բեռների՝ երկու ուղղությամբ անխափան տեղաշարժը Լաչինի միջանցքով՝ մինչև վերջնական որոշման կայացումը «Հայաստանն ընդդեմ Ադրբեջանի» հայցի վերաբերյալ։ Ադրբեջանը չի կատարում այդ որոշումը։
