ՌԴ-ն և Ուկրաինան պայմանավորվել են` ցորենով բեռնված նավերին հարվածներ չպետք է հասցվեն. ՄԱԿ
Ռուսաստանը և Ուկրաինան, համաձայն ռուսական ապրանքների մատակարարման սահմանափակումների վերացման և ուկրաինական հացահատիկի արտահանմանը Մոսկվայի աջակցության մասին փաստաթղթերի, պայմանավորվել են, որ Ուկրաինայից հացահատիկով բեռնված նավերը չպետք է հարձակումների ենթարկվեն: Տեղեկությունը ճեպազրույցի ժամանակ հայտնել է ՄԱԿ-ի բարձրաստիճան ներկայացուցիչը։
«Պայմանավորվածություն է ձեռք բերվել, որ կողմերից ոչ մեկը չպետք է հարձակվի նավերի վրա, որոնք տարածքային ջրերից դուրս են գալիս դեպի Սև ծով և այլն։ Այնպես որ, անվտանգ անցնումը կապահովվի։ Դրան կհետևի Ստամբուլում Համատեղ համակարգող կենտրոնի ստեղծումը։ Մենք ՄԱԿ-ում արդեն սկսել ենք որոշել` ով կլինի այդ կենտրոնում մեր ներկայացուցիչը»,- ասել է նա։
Համաշխարհային կազմակերպության բարձրաստիճան ներկայացուցչի խոսքով՝ հացահատիկի բեռնմանը կհետևեն ՄԱԿ-ը, Թուրքիան և Ուկրաինան:
Նա ընդգծել է, որ Ստամբուլում Համատեղ համակարգող կենտրոնը, որը պետք է ստեղծվի ուկրաինական նավահանգիստներից հացահատիկի դուրսբերումն ապահովելու համար, կհամալրվի առավելապես զինվորականներով:
ՄԱԿ-ի ներկայացուցչի խոսքով՝ հացահատիկով բեռնված նավերը համաձայնեցված միջանցքով Ուկրաինայից դուրս կգան Սև ծով:
Նա նաև ընդգծել է, որ Սև ծովով ուկրաինական հացահատիկի արտահանման մասին համաձայնագրի գործողության ժամկետը 120 օր է՝ երկարաձգման հնարավորությամբ:
