Իրանի առողջապահության փոխնախարարը վարակվել է կորոնավիրուսով

Իրանի առողջապահության փոխնախարար Իրաջ Հարիրչին վարակվել է կորոնավիրուսով: Այս մասին տեղեկացրել է «ՌԻԱ Նովոստի» գործակալությունը` հղում անելով Իրանի առողջապահության նախարարի խորհրդական Ալի Ռեզա Վահաբզադեին:

«Առողջապահության փոխնախարար դոկտոր Հարիրչիի դեպքում կորոնավիրուսի թեստը դրական է եղել»,-հայտարարել է Վահաբզադեն:

Երեկ Հարիրչիի և Իրանի կառավարության ներկայացուցիչ Ալի Ռաբիի համատեղ մամուլի ասուլիսի ընթացքում փոխնախարարը մի քանի անգամ փռշտացել է:

Նշենք, որ Covid-19 տեսակի կորոնավիրուսի հարուցիչով պայմանավորված հիվանդությունը շարունակվում է արագորեն տարածվել մի շարք երկրներում: ԱՀԿ ղեկավարի խոսքով` առավել անհանգստացնող են վերջին օրերին Հարավային Կորեայում, Իտալիայում, Իրանում գրանցված դեպքերը: Այնուամենայնիվ ամենաշատ դեպքերը գրանցվել են համաճարակի օջախ Չինաստանում, որտեղ գրանցվել է վարակի 77 000 դեպք, որից` 2600-ը մահվան ելքով:

Չինաստանի սահմաններից դուրս 30 երկրում հաստատվել է վարակման 1200 դեպք, որից 20-ը` մահվան ելքով: Covid-19 կորոնավիրուսից մահացության տոկոսը տատանվում է 1-2-ի միջև:

Երկուշաբթի օրը վարակման առաջին դեպքեր են գրանցվել նաև Աֆղանստանում, Քուվեյթում, Օմանում և Բահրեյնում, որտեղ վարակակիրները ժամանել են Իրանից: Իսկ այսօր առաջին երկու դեպքն է գրանցվել Ավստրիայում։