Վրաստանում կալանավորվել է ռադիոակտիվ նյութ տեղափոխող ՀՀ քաղաքացի

Վրաստանում Հայաստանի դեսպանությունը հայտարարություն է տարածել՝ ռադիոակտիվ նյութ տեղափոխելու համար կալանավորված ՀՀ քաղաքացու վերաբերյալ։ Վրաստանում ՀՀ դեսպանության մամուլի ծառայության տեղեկացմամբ, հայտարարության մեջ մասնավորապես գրված է․

«Տեղեկացնում ենք, որ հուլիսի 11-ին Վրաստանի պետական անվտանգության ծառայության աշխատակիցները ձերբակալել են ՀՀ քաղաքացի Մ․Մ․-ին, ով, վրացական կողմի հաղորդմամբ, հանդիսանում է հայ-վրացական սահմանին հայտնաբերված 71,63 կգ ռադիոակտիվ նյութի սեփականատերը («Տորիյ 232» տեսակի ռադիոակտիվ իզոտոպ)։

Թբիլիսիի քաղաքային դատարանը որոշում է կայացրել ՀՀ քաղաքացու նկատմամբ որպես խափանման միջոց կիրառել կալանքը:

Քրեական գործ է հարուցվել Վրաստանի քրեական օրենսգրքի 214 հոդվածի չորրորդ մասով և 230 հոդվածի առաջին մասով, «Միջուկային նյութերի ապօրինի շրջանառության» և «Պետական սահմանը հատելու կարգի խախտում» հատկանիշներով, որը ենթադրում է 5-10 տարի ազատազրկում։

Գործը քննում է Վրաստանի պետական անվտանգության ծառայության հակահետախուզության դեպարտամենտի գլխավոր քննչական վարչությունը:

Հայտնում ենք, որ Վրաստանում ՀՀ դեսպանության իրավաբանը շուտով կտեսակցի ՀՀ քաղաքացու հետ»։