Ադրբեջանցիները քարեր են նետել զինծառայողների մարմիններ տեղափոխող մեքենայի վրա
Գորիսի համայնքապետի տեղակալ Իրինա Յոլյանը ֆեյսբուքյան իր էջում գրել է, որ ադրբեջանցիները քարեր են նետել զինծառայողների մարմիններ տեղափոխող մեքենայի վրա, ջարդել ապակիները։
«Երեկ գիշերն ադրբեջանցիները քարեր են նետել զոհված զինծառայողների մարմինները տեղափոխող մեքենայի վրա, ջարդել ապակիները։ Վարորդը պատմում է, որ Ստեփանակերտից գիշերն է դուրս եկել, դեպի Գորիս ճանապարհվել, թանձր մառախուղ է եղել, զգացել է, որ մեքենային քարերով հարվածում են։ Դեպքը տեղի է ունեցել գիշերը, ժամը՝ 01։30-ին։ Վարորդը կանգ չի առել, շարունակել է վարել, Գորիս է հասցրել զոհվածների մարմինները։ Սրանք փաստեր են թշնամու ագրեսիվ վարքի մասին, որոնք պետք է արձանագրվեն և միջոցներ ձեռնարկվեն։ Խաղաղ բնակչի անվտանգ տեղաշարժի իրավունքը ի վերջո ո՞վ պետք է վերջապես երաշխավորի»,- գրել է Իրինա Յոլյանը:
