Կգնահատվի պատվաստանյութի համապատասխանությունը մեր ստանդարտներին. ԵՄ-ը սկսել է «Սպուտնիկ V»-ի հետազոտությունը
Դեղամիջոցների եվրոպական գործակալությունը սկսել է ռուսական «Սպուտնիկ V» հակակորոնավիրուսային պատվաստանյութի գրանցման դոսյեի հետևողական ուսումնասիրությունը, «ՌԻԱ Նովոստիի» տեղեկացմամբ, հայտնել է Ռուսաստանի ուղղակի ներդրումների հիմնադրամը։
Նշվում է, որ որոշումը կայացվել է՝ հաշվի առնելով մեծահասակների շրջանում դեղամիջոցի լաբորատոր և կլինիկական ուսումնասիրությունների արդյունքները:
«Դեղամիջոցների եվրոպական գործակալությունը կգնահատի ռուսական պատվաստանյութի համապատասխանությունը ԵՄ ստանդարտներին` արդյունավետության, անվտանգության և որակի տեսանկյունից»,- մանրամասնել են հիմնադրամից:
Հիշեցնենք՝ ներկայում ԵՄ շուկայում թույլատրվում են Pfizer/BioNTech (գնվել է շուրջ 600 միլիոն դեղաչափ), Moderna (գնվել է 160 միլիոն դեղաչափ) և AstraZeneca (գնվել է մոտ 400 միլիոն դեղաչափ) ընկերությունների կողմից արտադրված պատվաստանյութերը:
