Մեծ Բրիտանիայում համապետական ընտրությունները կանցկացվեն հուլիսի 4-ին
Մեծ Բրիտանիայի վարչապետ Ռիշի Սունակը հայտարարել է հուլիսի 4-ը որպես համապետական ընտրությունների օր: Ըստ Reuters-ի՝ վարչապետը այդպիսով վերջակետ է դրել նոր ընտրություններ նշանակել-չնշանակելու մասին ամիսներ տևած շահարկումներին:
Սպասվում է, որ իշխող պահպանողականները 14 տարի իշխանությունից հետո կպարտվեն ընդդիմադիր Լեյբորիստական կուսակցությանը:
44-ամյա Սունակը հայտարարել է, որ ընտրություններն ավելի շուտ է նշանակում, քան ոմանք ակնկալում էին: Ըստ դիտորների՝ դա ռիսկային ռազմավարություն է՝ հաշվի առնելով, որ հարցումներում Սունակի կուսակցության վարկանիշն անկում է գրանցում:
«Ժամանակն է, որ Բրիտանիան ընտրի իր ապագան», – հայտարարել է Սունակը՝ թվարկելով իր կառավարման ընթացքում երկրում տեղի ունեցած կարևորագույն իրադարձությունները: Նա առանձնապես կարևորել է այսպես կոչված «արձակուրդի ծրագրի» ներդրումը, որը գործարարներին օգնել է հաղթահարելու COVID-19 համավարակից կրած վնասները:
Ըստ դիտորդների՝ Սունակը գնում է ընտրությունների ոչ միայն ընտրություններում Լեյբորիստների նկատմամբ մեծ առավելություն ունենալով: Նշվում է, որ վարչապետը որոշ առումով մեկուսացված է իր կուսակցության որոշ անդամներից՝ փոխարենն ավելի է ապավինում իր խորհրդականներին:
Գործակալությունը նշում է, որ բրիտանական երկու կուսակցություններն էլ գործնականում սկսել են նախընտրական քարոզարշավը, և տնտեսության ու պաշտպանության վրա հարձակման գծերն արդեն հստակ ուրվագծված են։
Ռիշի Սունակն ու նրա կառավարությունը լեյբորիստներին մեղադրում են՝ նշելով, թե վերջիններս իշխանության մնալու դեպքում պատրաստ են բարձրացնել հարկերը: Նա հավելել է, որ կուսակցությունը հուսալի հենարան չի լինի Բրիտանիայի համար օրեցօր առավել վտանգավոր դարձող աշխարհում, քանի որ այն չունի ծրագիր: Ընդդիմությունը հերքում է մեղադրանքները՝ իր հերթին կառավարությանը մեղադրելով 14 տարվա տնտեսական վատ կառավարման և մարդկանց վիճակը ավելի վատթարացնելու համար:
Եթե լեյբորիստները ընտրություններում հաղթեն, իր քաղաքական կայունությամբ հայտնի Մեծ Բրիտանիան՝ 1830-ականներից ի վեր առաջին անգամ ութ տարվա կտրվածքով վեցերորդ անգամ վարչապետ կփոխի:
