ՔՊ-ն 525 նվիրատու ունի, սա կոռուպցիա չէ՞, ի՞նչ բնութագրում պետք է տալ սրան. Թագուհի Թովմասյանը Հայկուհի Հարությունյանին
««TM աուդիտ» ՓԲԸ-ի հաշվետվության մեջ նշված էր, որ իրենց կողմից բացահայտվել է, որ ՔՊ-ն 525 նվիրատուներ է ունեցել, որոնց մասով տեղեկությունները հայտնի չեն և մեկ անձից ստացել է 4 մլն 992 հազար դրամ նվիրատվություն, այն դեպքում, երբ մեկ անձի կողմից տարեկան նվիրատվությունը պետք է կազմի 2.5 մլն դրամ»,-այսօր ԱԺ-ում հայտարարեց «Պատիվ ունեմ» խմբակցության պատգամավոր Թագուհի Թովմասյանը:
«Դուք այս մասով ի՞նչ եք արել, որովհետեւ կուսակցության թափանցիկության մասին մենք ամենաշատը լսել ենք հենք ՔՊ-ից: Սա կոռուպցիա չէ՞, ինչ բնութագրում պետք է տալ սրան»,- ասաց նա՝ դիմելով Կոռուպցիայի կանխարգելման հաձնաժողովի նախագահ Հայկուհի Հարությունյանին:
Ի պատասխան Հայկուհի Հարությունյանն ասաց. «Թե՛ նախորդ տարի, թե՛ այս տարի հանձնաժողովը փորձել է իրականացնել այդ ստուգումը: Իրականում հաշվետվությունների հիման վրա ստուգումն իրականացվել էր և նախորդ տարվա ստուգումներն իրականացվել են՝ հաշվի առնելով օրենսդրական մի շարք բացեր և թերացումներ։ Օրենքից բխող պատասխանատվություն ենթադրող դրույթների կիրառելիությունը բարձրացնելու հարցն առնվազն այդ տարվա համար անցումային դրույթներով համարվեց ոչ կիրառելի: Այս տարվա արդյունքները ուսումնասիրության փուլում են, բայց թե ինչ պատասխանատվության մեխանիզմ կկիրառվի՝ ուսումնասիրության ավարտին պարզ կլինի»:
