Քաղաքացիները ազատ հրազեն կրելու իրավունք կստանան․ օրենսդրական փաթեթը ստացել է դրական եզրակացություն
Հայաստանում անհրաժեշտ է օրենսդրական մակարդակով կարգավորել զենքի կիրառմամբ քաղաքացիների ինքնապաշտպանության իրավունքի հարցը։ Այս մասին Ազգային ժողովում «Զենքի շրջանառության կարգավորման մասին» օրենքում փոփոխություններ և լրացումներ կատարելու մասին օրինագծերի փաթեթի քննարկման ժամանակ պաշտպանության և անվտանգության հարցերի մշտական հանձնաժողովի նիստում հայտարարեց օրենսդրական նախաձեռնության հեղինակ, իշխող «Քաղաքացիական պայմանագիր» խմբակցության պատգամավոր Վիլեն Գաբրիելյանը:
Պատգամավորի խոսքով՝ ներկայացված փաթեթն ուղղված է այս ոլորտում կոռուպցիոն հնարավոր դրսևորումների վերացմանը, ապօրինի զենքի քանակի կրճատմանը և ապօրինի շրջանառությունից դրանց աստիճանական դուրսբերմանը։ «Երկրի քաղաքացիները, մասնավորապես, հրազեն կրելու իրավունք կստանան, եթե կատարեն մի շարք պահանջներ, այդ թվում՝ հոգեկան կայունություն, համապատասխան լիցենզիայի առկայություն և այլն»,- պարզաբանեց պատգամավորը։
Նշվել է, որ նախագծերի փաթեթի ընդունումը կնպաստի նաև որսորդության, սիրողական և սպորտային հրաձգության, ինչպես նաև ռազմամարզության զարգացմանը:
Հարակից զեկուցող, ԱԺ պաշտպանության և անվտանգության հարցերի մշտական հանձնաժողովի նախագահի տեղակալ Արմեն Խաչատրյանը, կարևորելով օրենսդրական փաթեթի ընդունումը, գործընկերներին կոչ է արել կողմ քվեարկել:
ՀՀ ներքին գործերի նախարարի տեղակալ Արփինե Սարգսյանը ներկայացրել է Կառավարության դրական դիրքորոշումը: Նա կարևորել է հեղինակի հետ համատեղ աշխատանքը փաթեթի վերաբերյալ:
Քննարկման արդյունքում օրենսդրական փաթեթը ստացել է դրական եզրակացություն:
