Ադրբեջանական լրատվամիջոցը Նիկոլի ստրասբուրգյան հակառուսական ելույթի, Մոսկվայի արձագանքի և իրենց եղբոր տապալման մասին

Հայաստանը երբեք Ուկրաինայի ճակատագիրը չի կիսի, հարկ եղած դեպքում ռուսական զորքն ընդամենը 2- 3 ժամում կվերցնի Երևանը

 

Օրերս առիթ եղավ ծանոթանալու Ստրասբուրգում Եվրախորհրդարանի նստաշրջանում հոկտեմբերին Նիկոլի ունեցած ելույթի և Հայաստանի ներքաղաքական իրադարձությունների վերաբերյալ ադրբեջանական հայտնի լրատվամիջոցներից մեկի՝ haqqin.az- ի հրապարակմանը , ըստ որի, Նիկոլի ելույթը վրդովմունք է առաջացրել Մոսկվայում:

Մոսկվային, ինչպես գրել է հոդվածագիր Ֆարհադ Մամեդովը, զայրացրել է վարչապետի ելույթի այն հատվածը, որտեղ Փաշինյանը, անուններ չտալով, Ռուսաստանին մեղադրել է Հայաստանում պետական հեղաշրջում իրականացնելու փորձերի, դաշնակցային պարտավորությունները չկատարելու մեջ։

Դե երևի բոլորին էլ Նիկոլի իրավիճակը հասկանալի է. այն պետական դավաճանությունից և ոճրագործություններից հետո, որ կատարել է Արցախի, Հայաստանի, հայերիս նկատմամբ, ինչպես նաև Ռուսաստանի և ՀԱՊԿ- ի նկատմամբ իր նենգ, տմարդի, դավաճանական վերաբերմունքից հետո Նիկոլը հիմա նույնիսկ ստվերներից կարող է վախենալ, որ նրանք ցանկացած պահի կարող են պետական հեղաշրջում իրականացնել: Սա այն դեպքն է, երբ կարելի է ասել իրավունք ունի վախենալու, քանի որ վաստակել է…

Ինչ վերաբերում է ՌԴ- ի կողմից իր դաշնակցային պարտավորությունները չկատարելու մեղադրանքին, ինչպես քանիցս հիմնավորել ու դեռ էլի կհիմնավորենք, դա ընդամենը հերյուրանք է, այս անգամ պարզապես հնչեցված Եվրախորհրդարանի ամբիոնից (կարելի է ենթադրել, որ դրանից հետո Նիկոլի արևմտյան «քեռիները» նրա գլուխը շոյած կլինեն…):

Ինչպես նշված է ադրբեջանական ԶԼՄ- ի հրապարակման մեջ, Մոսկվայում «բարձրաստիճան աղբյուրի» հայտարարության մեջ, որին հղում են անում ՏԱՍՍ և «ՌԻԱ Նովոստի» լրատվական գործակալությունները, Կրեմլը, մասնավորապես, մեղադրել է Հայաստանի վարչապետին «անպատասխանատվության և սադրանքի» մեջ՝ ընդգծելով, որ Փաշինյանը «յոթ մղոնանոց քայլերով վերածվում է հաջորդ Զելենսկու»»։

«Հասկանալի է, որ խոսքն ամենևին էլ Փաշինյանին Ուկրաինայի նախագահ Վլադիմիր Զելենսկու հետ համեմատելու մասին չէ, որը գրեթե երկու տարի խիզախորեն դիմադրում է Ռուսաստանի լայնածավալ ռազմական ներխուժմանը,- գրել է haqqin.az- ը:- Ավելի շուտ, Մոսկվան «բարձրաստիճան աղբյուրի» շուրթերով զգուշացնում է Հայաստանին, որ կարող է ստանալ Ուկրաինայի ճակատագիրը։ Ի դեպ, նման «ծանուցումներ» Հայաստանի իշխանությունները նախկինում էլ Ռուսաստանից ստացել են ինչպես բաց, այնպես էլ փակ խողովակներով։

Մի խոսքով, Փաշինյանի ելույթը Ստրասբուրգում կտրուկ սրեց Երևանի և Մոսկվայի առանց այն էլ ծայրահեղ լարված հարաբերությունները։

Միևնույն ժամանակ, Վրաստանի նախկին նախագահ Միխեիլ Սաակաշվիլին, ոգեշնչված Փաշինյանի ելույթից, Հայաստանին կոչ է արել «վա-բանկ գնալ» Ռուսաստանի դեմ, անհապաղ սկսել ՀԱՊԿ-ից և Եվրասիական տնտեսական միությունից դուրս գալու ընթացակարգը, ինչպես նաև երկրից վտարել 102-րդ բազան և հայտ ներկայացնել ՆԱՏՕ-ին և Եվրամիությանը անդամակցելու համար: Վկայակոչելով սեփական փորձը՝ Սաակաշվիլին զգուշացրել է, որ եթե առաջիկայում Փաշինյանը դա չանի, ապա Պուտինը կոչնչացնի և իրեն, և Հայաստանը»։

Գլուխը պատին է տվել Սաակաշվիլին, թե Պուտինը կոչնչացնի Հայաստանը, Նիկոլին ոչնչացնելու մտադրություն էլ թե ունենար, արդեն պետք է ոչնչացրած լիներ… Համենայն դեպս, Հայաստանում շատերն ուրախ կլինեին, եթե Պուտինն ինչ- որ կերպ Նիկոլի հարցերը լուծեր, իշխանությունից հեռացներ այդ քայլող չարիքին:

Իրականությունից հեռու է նաև Մամեդովի այն մեկնաբանությունը, թե «Մոսկվան «բարձրաստիճան աղբյուրի» շուրթերով զգուշացնում է Հայաստանին, որ կարող է ստանալ Ուկրաինայի ճակատագիրը»:

Այդպիսի զգուշացում չի եղել, ադրբեջանական լրատվամիջոցը եթե չնենգափոխեր, կզարմանայինք: Զգուշացումը բոլորովին այլ բանի է վերաբերել՝ Փաշինյանը «յոթ մղոնանոց քայլերով վերածվում է հաջորդ Զելենսկու», այսինքն՝ հետխորհրդային հանրապետություններից մեկի ղեկավարի պաշտոնը զբաղեցնող, միաժանանակ դեպի Արևմուտք կողմնորոշված ու Ռուսաստանի նկատմամբ թշնամական քաղաքականություն վարող գործչի, ինչը լիովին համապատասխանում է իրականությանը:

Վերոնշյալ զգուշացման առումով հոդվածի վերնագրում գրվածն էլ՝ Կրեմլը սպառնում է Փաշինյանին…, չի համապատասխանում իրականությանը, դրանով haqqin.az- ը, ըստ էության, Նիկոլի թելն է թելել, որի ստրասբուրգյան ելույթի վերաբերյալ, ինչպես վերը մեջբերեցինք, գրել է՝ «Փաշինյանը, անուններ չտալով,  Ռուսաստանին մեղադրել է Հայաստանում պետական հեղաշրջում իրականացնելու փորձերի» մեջ:

Հայաստանը երբեք Ուկրաինայի ճակատագիրը չի կիսի՝ արդեն շուրջ 2 տարի Ռուսաստանի դեմ շարունակվող պատերազմ, մեծաթիվ զոհեր, բազմաթիվ ավերված քաղաքներ ու գյուղեր, ավերված ենթակառուցվածքներ և արդյունաբերություն… Եթե Նիկոլի ու նրա ոհմակի մեղքով (ՌԴ- ի նկատմամբ առավել առարկայական թշնամական վերաբերմունք, ՆԱՏՕ- ին անդամակցելու քաղաքական ուղեգիծ և այլն), Աստված մի արասցե, երբևե բանը հասնի Հայաստանի և Ռուսաստանի միջև ռազմական հակամարտության, ապա Ռուսաստանի Զինված ուժերին, կարծում ենք, ընդամենը 2- 3 ժամ կպահանջվի (եթե ոչ ավելի կարճ ժամանակ…) Երևան հասնելու և 2018- ի «թավիշով» սկսված մղձավանջին վերջակետ դնելու համար: Հե՛նց այդպես:

Ադրբեջանական ԶԼՄ- ն անդրադարձել է նաև Նիկոլի ստրասբուրգյան հակառուսական ելույթի ու դրան մոսկովյան արձագանքի առումով հայաստանյան ընդդիմության վերաբերմունքին ու հնարավոր քայլերին:

 

Շարունակելի

Արթուր Հովհաննիսյան