ԱԳՆ-ը ամփոփել է Արարատ Միրզոյանի պաշտոնական այցը ԱՄԷ, որը վերջին 6 ամիսներին 2-րդ էր
Անցած շաբաթ ամփոփվեց ՀՀ ԱԳ նախարար Արարատ Միրզոյանի պաշտոնական այցն Արաբական Միացյալ Էմիրություններ, որը վերջին 6 ամիսների ընթացքում երկրորդ այցն էր դեպի արաբական երկրներ։ Այս մասին տեղեկանում է ՀՀ ԱԳՆ-ից։
Նախորդը՝ մարտին, ԱԳ նախարարի այցն էր Եգիպտոս, որի շրջանակներում Արարատ Միրզոյանը ելույթ ունեցավ Արաբական պետությունների լիգայի խորհրդի` նախարարական մակարդակով նիստին։
ԱՄԷ այցի ընթացքում կայացած հանդիպումներն ու միջոցառումներն էին.
– հանդիպում ԱՄԷ նախագահի և ԱԳ նախարարի հետ,
– հանդիպում ԱՄԷ դաշնային ազգային խորհրդի նախագահի հետ,
– զրույց ԱՄԷ հանդուրժողականության և համակեցության հարցերով նախարարի հետ,
– ՀՀ և ԱՄԷ քաղաքացիների համար մուտքի արտոնագրի պահանջի փոխադարձաբար վերացման մասին արձանագրության ստորագրում,
– Երկու երկրների միջև դիվանագիտական հարաբերությունների հաստատման 25-ամյակին նվիրված ընդունելություն,
– Մերձավոր ու Միջին Արևելքում հավատարմագրված ՀՀ դիվանագիտական ներկայացուցչությունների ղեկավարների հավաք:
Հայաստանը մեծ կարևորություն է տալիս արաբական աշխարհի երկրների հետ երկկողմ օրակարգի հետագա զարգացմանը, ինչպես նաև տարածաշրջանային հարցերի շուրջ փոխըմբռնման խորացմանը: