Արցախի բնակչության ողբերգության հաշվին խայտառակ շոու են իրականացնում Ֆրանսիան, ԱՄՆ- ը, Գերմանիան, գրեթե ողջ անբարո Արևմուտքը
Ցեղասպանության համապատկերին զբաղված են կապիկություններով, կլոունադայով
Կատարվողը մի անբարո, խայտառակ կլոունադա է, որ ցեղասպանության եզրին կանգնած Արցախի բնակչության ողբերգության հաշվին ու համապատկերին իրականացրել և իրականացնում են արևմտյան մի շարք պետություններ: Կապիկությամբ են զբաղված Ֆրանսիան, ԱՄՆ-ը, Գերմանիան, արևմտյան այլ պետություններ և եվրոպական որոշ կազմակերպություններ:
Փարիզի քաղաքապետի գլխավորած պատվիրակության կազմում Հայաստան ժամանած, մինչև Բերձորի (Լաչինի) միջանցքի սկզբնամասի մոտ հասած, բայց միջանցքով չանցած Ֆրանսիայի Սենատի «Հանրապետական» խմբակցության ղեկավար Բրունո Ռետայոն Լաչինի արգելափակված միջանցքից X-ի (նախկին Twitter-ի) իր միկրոբլոգում լուսանկար է հրապարակելով, գրել է.
«Կանգնելով արգելափակված Լաչինի միջանցքի առջև՝ ես կոչ եմ անում Ֆրանսիային ընդունել բանաձև՝ միջանցքը մարդասիրական նպատակներով անհապաղ բացելու մասին, որը փակել է ավտորիտար Ալիևը անցյալ տարվա դեկտեմբերին։ Պետք է վերջ դնել նրա վարած ցեղասպան քաղաքականությանը, որը դատապարտվել է Միջազգային քրեական դատարանի նախկին գլխավոր դատախազ Լուիս Մորենո Օկամպոյի և Ցեղասպանության կանխարգելման հարցերով ՄԱԿ-ի նախկին փորձագետ Խուան Մենդեսի կողմից։ Ժամանակը լրանում է»:
Հետաքրքիր է՝ ինչի՞ ժամանակն է լրանում…
Ֆրանսիայի Սենատի պատգամավորին դժվա՞ր է հասկանալ, որ միայն ուժի, հարկադրանքի լեզուն հասկացող Ալիևի և Ադրբեջանի համար զուգարանի թղթի պես մի բան է լինելու միջանցքը մարդասիրական նպատակներով անհապաղ բացելու մասին Ֆրանսիայի ցանկացած բանաձև, քանի որ այն միջազգային իրավունքի տեսանկյունից պարտադիր կատարման բնույթ չի կարող ունենալ: Լավագույն դեպքում այն ֆրանսիական փքունությամբ պահանջ է լինելու, որի վրա Ալիևը կթքի:
Եթե Բրունո Ռետայոն անկեղծ է և իսկապես ուզում է օգնել Արցախի բնակչությանը, թող Ֆրանսիայի նախագահ Էմանուել Մակրոնից, երկրի ողջ ղեկավարությանից պահանջի անհապաղ դիմել ՄԱԿ- ի Անվտանգության խորհուրդ՝ հիշյալ միջանցքը բացելու վերաբերյալ ՄԱԿ- ի Արդարադատության միջազգային դատարանի 2023թ. փետրվարի 22-ի և հուլիսի 6- ի որոշումների կատարումը ՄԱԿ- ի Կանոնադրության 41- րդ և 42- րդ հոդվածների, այսինքն՝ հարկադրանքի, ուժի կիրառմամբ ապահովելու խնդրով: Այլապես մնացյալը կապիկություն է, կլոունադա: Ի վերջո, Ռետայոն ընդամենը բանաձև ընդունելու կոչ է արել Ֆրանսիային, բայց դա ամենևին չի նշանակում, թե Ֆրանսիան կընդունի նրա ակնկալած բանաձևը:
Նույնը կարող ենք ասել նաև անձամբ Ֆրանսիայի նախագահ Էմանուել Մակրոնի առնչությամբ, որը քաջատեղյակ լինելով Արցախի Հանրապետությունում հումանիտար ճգնաժամի օրեցօր խորացմանը և դրա հաղթահարմանն ու լուծմանն ուղղված գործնական և արդյունավետ քայլերի անհրաժեշտությունը, առ այսօր չի կատարում նշված քայլերը, մասնավորապես՝ վերոնշյալ խնդրանքով կամ պահանջով չի դիմում ՄԱԿ-ի Անվտանգության խորհուրդ, Ֆրանսիան նույնիսկ ֆինանսական, տնտեսական պատժամիջոցներ չի սահմանում Ադրբեջանի նկատմամբ, ասենք, արգելանք չի դնում ֆրանսիական բանկերում ադրբեջանական հաշիվների վրա, չի դադարեցնում նրա հետ իր երկկողմանի առևտուրը:
Կապիկություններով, կլոունադայով են զբաղված նաև ԱՄՆ- ը և Գերմանիան: Միացյալ Նահանգները Արդարադատության միջազգային դատարանի վերոնշյալ որոշումների կատարումն ապահովելու խնդրով ՄԱԿ- ի ԱԽ դիմելու փոխարեն, իր պետքարտուղարի եվրոպական և եվրասիական հարցերով տեղակալի պաշտոնակատար Յուրի Քիմի միջոցով ԱՄՆ-ում Հայաստանի արտակարգ և լիազոր դեսպան Լիլիթ Մակունցի հետ այսօր քննարկել է Լեռնային Ղարաբաղում հումանիտար իրավիճակի կարգավորման գործում ընդհանուր հանձնառության ամրապնդման հարցը: Նշված քննարկման մասին X-ի (նախկին Twitter) էջում հայտնել է ԱՄՆ պետդեպարտամենտի Եվրոպայի և Եվրասիայի հարցերով բյուրոյի պաշտոնական էջը:
Այդ ի՞նչ է հանձնառել ԱՄՆ-ն Արցախում հումանիտար իրավիճակի կարգավորման հարցում, որ հիմա էլ Ալիևի ահուսարսափ Մակունցի հետ դրա ամրապնդման հարցն է քննարկել… Եթե իսկապես որևէ նշանակալի բան հանձնառած լիներ, կիմանայինք, նույնիսկ եթե հանձնառել է, բայց չենք իմացել, ապա մինչ այժմ Արցախի և Հայաստանի անվտանգության հարցում իր ո՞ր մի հանձնառածին է տեր կանգնել…
Գերմանիայի արտաքին գործերի նախարար Անալենա Բերբոքն էլ, իր հերթին, հայտնել է Իսպանիայում Եվրամիության արտգործնախարարների այսօրվա հանդիպման օրակարգում Լեռնային Ղարաբաղում տիրող իրավիճակի հարցն ընդգրկելու մասին: Բերբոքը Ղարաբաղում ապրող մարդկանց վիճակն աղետալի է անվանել, նշել, որ Լաչինի միջանցքը «պետք է ազատ լինի մարդասիրական օգնության համար»։ Լավ է արել, այդ նույն բանը մենք էլ ենք ասում, օգուտն ի՞նչ…
Գործնական քայլեր են անհրաժեշտ նաև Գերմանիայի կողմից, ոչ թե ճառեր, ինչ- որ հայտարարություններ, դատարկ, դատարկ խոսքեր: Եթե Գերմանիան Արցախի բնակչությանն օգնելու հարցում անկեղծ լիներ, զոհաբերեր Ադրբեջանի հետ կապված իր տնտեսական շահերի թեկուզ մի փոքր մասը, Ալիևը Բերձորի (Լաչինի) միջանցքն արդեն բացած կլիներ:
Արցախից ստացված պաշտոնական տեղեկատվության համաձայն՝ այնտեղ արձանագրված մահերից յուրաքանչյուր երրորդը թերսնության հետևանք է:
Շարունակելի
Արթուր Հովհաննիսյան
