Ադրբեջանական գազը ԵՄ է գալիս մասամբ Ռուսաստանից. ֆրանսիացի սենատորը քննադատել է Եվրահանձնաժողովին
Ավելի լավ կլիներ, եթե Եվրահանձնաժողովի նախագահ Ուրսուլա ֆոն դեր Լայենը գազային համաձայնագիր չստորագրեր Ադրբեջանի հետ։ Այս մասին օգոստոսի 30-ին Հայաստանում կայացած մամուլի ասուլիսում հայտարարել է Ֆրանսիայի Սենատի անդամ Բրունո Ռետայոն։
Նրա խոսքով, դա գազ է, որը մասամբ գալիս է Ռուսաստանից։
«Սա ուղղակի աջակցություն է Ալիևին, ով ճնշում է արցախահայությանը»,- նշել է սենատորը։
Հիշեցնենք, որ 2022 թվականի հուլիսին ստորագրված փաստաթուղթը վերաբերում է Հարավային գազային միջանցքի հզորությունների կրկնապատկմանը։ Ակնկալվում է, որ մինչև 2027 թվականն ադրբեջանական գազի ներմուծումը ԵՄ կաճի մինչև տարեկան 20 միլիարդ խորանարդ մետր։
Ֆրանսիայի Օ դը Ֆրանս շրջանի ղեկավար Քսավյե Բերտրանն իր հերթին պարզաբանել է, որ Ֆրանսիայի նախաձեռնությունները կյանքի կոչելու համար անհրաժեշտ է Եվրամիության և մյուս գործընկերների աջակցությունը։ «Մենք չենք կարող գործել առանց ԵՄ-ի»,- ասել է նա։