Թուրքիայում կրկին զինված հարձակում է կատարվել ընդդիմադիր կուսակցության գրասենյակի մոտակայքում
Ապրիլի 6-ին Թուրքիայում զինված հարձակում է տեղի ունեցել ընդդիմադիր քեմալական «Ժողովրդահանրապետական» կուսակցության (CHP) Ստամբուլի գրասենյակի մոտակայքում: Ինչպես նշել է կուսակցության գրասենյակի անվտանգության աշխատակիցը, հնչել է 6-7 կրակոց: Այս մասին գրում է «Էրմենիհաբեր»-ը:
Կուսակցության Ստամբուլի նահանգային գրասենյակի ղեկավար Ջանան Քաֆթանջըօղլուի խոսքով, փորձել են հարձակվել կուսակցության շենքի վրա:
Մի շարք կուսակցական և այլ քաղգործիչներ, այդ թվում «Հայրենիք» կուսակցության նախագահ և գալիք ընտրություններում նախագահի թեկնածու Մուհարեմ Ինջեն, որը նախկինում «Ժողովրդահանրապետական» կուսակցության անդամ է եղել, դատապարտող հայտարարություններ են տարածել:
Հիշեցնենք, որ ավելի վաղ հարձակում էր տեղի ունեցել նաև «Լավ» կուսակցության Ստամբուլի գրասենյակի վրա, և մի շարք ընդդիմադիր գործիչներ մեղադրել էին իշխող կուսակցությանը հարձակումը կազմակերպելու համար:
