Հայաստանում գրանցվել է լայմի հիվանդության 19 դեպք
Հայաստանում այս տարվա 9 ամիսներին գրանցվել է լայմի հիվանդության 19 դեպք: Այս մասին տեղեկանում ենք ՀՀ վիճակագրական կոմիտեից։
Հիվանդներից 2-ը եղել են 3-6 տարեկան երեխաներ, իսկ մյուսները՝ մինչև 18 տարեկան։
Նշենք, որ 2021 թվականի հունվար-սեպտեմբերին հանրապետությունում գրանցվել է լայմի հիվանդության 2 դեպք։
Լայմի հիվանդությունը տզերի միջոցով տարածվող ինֆեկցիոն հիվանդություն է: Համարվում է փոխանցողով պայմանավորված ամենատարածված հիվանդությունը Եվրոպայում, Ասիայում, Հյուսիսային Ամերիկայում: Հիվանդությունը փոխանցվում է վարակված իքոդային տզերի խայթոցից: Տզերը վարակվում են թռչուններին կամ կաթնասուններին խայթելիս:
Լայմի հիվանդության գաղտնի շրջանը 3-32 օր է: Հիվանդության վաղ շրջանի ախտանշաններն են տենդը, գլխացավը, հոգնածությունը և «թափառող էրիթեմա» կոչվող մաշկային ցանը: Տզերի խայթոցից խուսափելու համար խորհուրդ է տրվում բնության մեջ զբոսնելիս կամ աշխատելիս կրել երկարաթև հագուստ, օգտագործել միջատավանիչ նյութեր:
