ՌԴ նախազգուշացումներին ԱՄՆ-ի, Անգլիայի և Ֆրանսիայի լկտի վերաբերմունքը վկայում է, որ Զելենսկու միջուկային սադրանքի ետևում նրանք են կանգնած
Եթե նույնիսկ ԱՄՆ-ի, Անգլիայի և Ֆրանսիայի անմիջական ցուցումով կամ հրամանով չէ Ուկրաինայի նախագահ Վլադիմիր Զելենսկու կողմից նախապատրաստվող միջուկային սադրանքը, ապա առնվազն նրանց գիտությամբ ու հովանավորությամբ է:
Ռուսաստանի պաշտպանության նախարար Սերգեյ Շոյգուն երեկ և նախորդած երկու օրերին, հեռախոսազրույցներ է ունեցել ԱՄՆ-ի, Մեծ Բրիտանիայի, Ֆրանսիայի և Թուրքիայի պաշտպանության նախարարների հետ։ Շոյգուն նրանց է փոխանցել Ուկրաինայի կողմից «կեղտոտ միջուկային ռումբի» օգտագործմամբ հնարավոր սադրանքի վերաբերյալ ռուսական կողմի մտահոգությունները։ Թե ինչո՞ւ հենց նշված պետությունների պաշտպանության նախարարներին է զանգել, թերևս կփորձենք բացատրել առանձին հրապարակմամբ:
«Կեղտոտ միջուկային ռումբը» կամ ռադիոլոգիական զենքը զանգվածային բնաջնջման զենքի տեսակներից մեկն է: Այն սովորական պայթուցիչով ռումբ կամ մարտագլխիկ է, որում ներառված ռադիոակտիվ նյութերը պայթյունի հետևանքով ցրվում են մեծ մակերեսով՝ առաջ բերելով տեղանքի կամ շրջակա միջավայրի ռադիոակտիվ աղտոտում` վտանգավոր մարդկանց ու կենդանիների առողջության ու կյանքի համար:
Եվ ի՞նչ եք կարծում` ինչպե՞ս են արձագանքել ԱՄՆ-ը, Մեծ Բրիտանիան և Ֆրանսիան Ռուսաստանի վերոնշյալ նախազգուշացմանը (Թուրքիայի արձագանքի մասին դեռ տեղեկություն չկա)… Միացյալ Նահանգների Պետդեպարտամենտի կողմից երեկ հրապարակված ԱՄՆ-ի, Մեծ Բրիտանիայի և Ֆրանսիայի համատեղ հայտարարության մեջ նշված է, որ նշված պետությունների արտաքին գործերի նախարարությունները հիմնավորված չեն համարում ռուսական կողմի նախազգուշացումները Կիևի կողմից, այսպես կոչված, կեղտոտ ռումբ օգտագործելու հնարավորության մասին։
Երեք պետությունների դիվանագիտական գերատեսչությունների ղեկավարները նաև վստահեցրել են, որ մտադիր են «աջակցել իր տարածքը պաշտպանելու Ուկրաինայի ջանքերին այնքան, որքան դա կպահանջվի»։ ԱՄՆ-ի, Մեծ Բրիտանիայի և Ֆրանսիայի արտգործնախարարները, դարձյալ ինչպես հայտարարությունում է նշված, «քննարկել են Ուկրաինային և ուկրաինացիներին ռազմական և տնտեսական օգնության տրամադրման հանձնառությունը…»։
«Այսօր ավելի վաղ մեր երեք երկրների պաշտպանության նախարարները ՌԴ պաշտպանության նախարար Սերգեյ Շոյգուի խնդրանքով զրուցել են նրա հետ,- նշված է հիշյալ հայտարարությունում:- Մեր երկրները հստակ հասկացրել են, որ իրենք ժխտում են ակնհայտ կեղծ պնդումներն այն մասին, թե Ուկրաինան պատրաստվում է «կեղտոտ ռումբ» կիրառել իր տարածքում… Մենք նաև մերժում ենք Ռուսաստանի կողմից էսկալացիայի ցանկացած պատրվակ»։
Դե քանի որ Զելենսկու տիկնիկավարներն Արևմուտքում են, ապա ի սկզբանե պարզ էր, թե ինչպես են արձագանքելու: Կարծում ենք, Շոյգուն էլ պատրանքներ չի ունեցել վերոնշյալ եռյակի արձագանքի առումով, բայց զանգել է նրանց հետևյալի համար` կանխեք Զելենսկու միջուկային սադրանքը (հասկանալ` ԱՄՆ և Մեծ Բրիտանիա, հրաժարվեք Ուկրաինայի միջոցով ձեր միջուկային սադրանքից), հակառակ դեպքում հետևանքների պատասխանատվությունը նաև ձեր վրա է ընկնում:
Հարկ է ուշադրություն դարձնել ԱՄՆ-ի, Մեծ Բրիտանիայի և Ֆրանսիայի արտգործնախարարների հայտարարության հատկապես հետևյալ մասին. «Մենք նաև մերժում ենք Ռուսաստանի կողմից էսկալացիայի ցանկացած պատրվակ»։ Սա նշանակում է, որ եթե ԱՄՆ-ը, Մեծ Բրիտանիան, ԱՄՆ-ի կամակատար Ֆրանսիան և այլ պետություններ, ի վերջո, հետևանքներից զգուշանալով, չկանխեն Ուկրաինայի կողմից նախապատրաստվող միջուկային սադրանքը, և այն իրականություն դառնա, ապա տվյալ սադրանքը վերագրելու են ՌԴ-ին, ավելին` Ռուսաստանի պատասխանատվության, պատժի հարցն են բարձրացնելու: Նորություն չէ, որ ԱՄՆ-ը և Մեծ Բրիտանիան ունակ են հրեշավոր ստերի, կեղծիքների ու սադրանքների, իսկ Մակրոնն այդ դեպքում թութակի պես կկրկնի ԱՄՆ-ից կամ Մեծ Բրիտանիայից դուրս եկած այն կեղծիքը, ինչ իրենից կպահանջի կրկնել Բայդենը:
Որ ԱՄՆ-ի ու Մեծ Բրիտանիայի ներկայիս նպատակադրումը հենց վերը նշվածն է, հուշում են նույնիսկ Հայաստանում, կարելի է ենթադրել, Արևմուտքի կողմից ֆինանսավորվող և ուղղորդվող, բայց միանշանակ հակառուսական, այդ առումով առաջատար և մասնագիտացած ԶԼՄ-ների երեկվա և այսօրվա հրապարակումները, օրինակ, այս զրպարտչական վերնագրով` «ՌԴ-Ն խոշոր սադրանք է նախապատրաստում. Շոյգուի զանգերը դրա վկայությունն են»:
Եվս մի շատ կարևոր հանգամանք. ԱՄՆ-ը, Մեծ Բրիտանիան, ԱՄՆ-ի խամաճիկ եվրոպական բազմաթիվ պետություններ տևական ժամանակ բարբաջում են, թե Ռուսաստանն իբր մտադիր է Ուկրաինայում միջուկային զենք կիրառել, ՌԴ ռազմաքաղաքական ղեկավարությունը բազմիցս հերքել է դա և իրականում չունի դրա կարիքն ու նշված մտադրությունը: Հիմա, դատելով ամենից, կարծես նպատակ կա սադրելու Ռուսաստանի կողմից մարտավարական միջուկային զենքի կիրառում: Այս առումով ամբողջ խնդիրն այն է, թե Ուկրաինան որտեղ կիրականացնի զանգվածային բնաջնջման զենքի կիրառմամբ վերոնշյալ սադրանքը` ի՞ր, թե ՌԴ տարածքում (Ղրիմում, ՌԴ Դոնեցկի, Լուգանսկի, Զապորոժիեի կամ Խերսոնի մարզերում)…
Թեև ԱՄՆ-ի, Մեծ Բրիտանիայի և Ֆրանսիայի արտգործնախարարների հայտարարության մեջ նշված է` «Մեր երկրները հստակ հասկացրել են, որ իրենք ժխտում են ակնհայտ կեղծ պնդումներն այն մասին, թե Ուկրաինան պատրաստվում է «կեղտոտ ռումբ» կիրառել իր տարածքում», սակայն հարկ է նկատի ունենալ, որ նշված պետություններն Ուկրաինայի տարածք են համարում նաև Ղրիմը, ՌԴ Դոնեցկի, Լուգանսկի, Զապորոժիեի և Խերսոնի մարզերը:
Եթե Ուկրաինան «կեղտոտ միջուկային ռումբ» կիրառի ՌԴ տարածքում, ապա այն Ռուսաստանին և՛ կհարկադրի, և՛, իր միջուկային դոկտրինի համաձայն, իրավունք կտա մարտավարական միջուկային զենք կիրառել Ուկրաինայի ռազմավարական կարևորագույն թիրախների նկատմամբ:
Վերոնշյալ սադրանքի նպատակը, որի ետևից երևում են ԱՄՆ-ի ցցված ականջները, հավանաբար հենց այն է, ՌԴ-ին սադրեն ու հարկադրեն Ուկրաինայում միջուկային զենք կիրառել, որպեսզի ԱՄՆ-ը ու նրա գլխավորած հավաքական Արևմուտքը Ռուսաստանի նկատմամբ իրենց ձեռքերին ազատություն տան և այդպիսով կանխեն ընթացող հակամարտությունում ոչ միայն Ուկրաինայի, այլև իրենց անխուսափելի պարտությունը: ԱՄՆ նախագահ Ջո Բայդենի ազգային անվտանգության հարցերով խորհրդական Ջեյք Սալիվանն ավելի վաղ Ռուսաստանին սպառնացել է, որ վերջինիս կողմից Ուկրաինայում մարտավարական կամ առավել հզոր միջուկային զենքի կիրառման դեպքում ԱՄՆ-ը նույնակերպ է արձագանքելու:
Արթուր Հովհաննիսյան