Բեռլինում վախենում են Ռուսաստանի տարածքում գերմանական տանկերի հայտնվելուց
Գերմանիան հրաժարվում է իր տանկերը մատակարարել Ուկրաինային՝ վախենալով Ռուսաստանում ռազմական մեքենաների «հայտնվելուց», գրում է Spiegel ամսագիրը՝ հղում անելով Գերմանիայի կառավարության աղբյուրներին։
Նրանց տեղեկություններով՝ Բեռլինը կարծում է, որ Ուկրաինայի ղեկավարությունը կարող է օգտագործել գերմանական տեխնիկան՝ փորձելով ներխուժել Ռուսաստանի տարածք, որը կհիշեցնի ֆաշիստական Գերմանիայի գործողությունները Հայրենական մեծ պատերազմի ժամանակ։
«Սա կնշանակի, որ գերմանական տանկերը կրկին կհայտնվեն Ռուսաստանի տարածքում»,- ասվում է հոդվածում։
Spiegel-ի զրուցակիցները պարզաբանել են, որ Գերմանիայի կառավարությունը չի կարող վստահել Կիևին այս հարցում։
«Այս մտավախությունը ցույց է տալիս Բեռլինում որոշակի անվստահություն Ուկրաինայի նախագահ Վլադիմիր Զելենսկու նկատմամբ, և դա էր նաև պատճառը, որ գերմանական պաշտպանական արդյունաբերությունը մարտական տանկեր մատակարարելու թույլտվություն չստացավ»,- պարզաբանել են աղբյուրները։
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։
