Ընդդիմադիր երկու պատգամավորների նկատմամբ քրեական գործ է հարուցվել․ Արծվիկ Մինասյան
Գործող վարչապետ Նիկոլ Փաշինյանի իրավապահ համակարգը հերթական անհասկանալի, ակնհայտորեն խուճապային գործողություն է կատարել։ Այս մասին մայիսի 27-ին Ֆրանսիայի հրապարակում լրագրողների հետ զրույցում ասաց «Հայաստան» խմբակցության քարտուղար Արծվիկ Մինասյանը։
Նա նշեց, որ խոսքը մի քանի կոնկրետ միջադեպերի մասին է։ Այսպիսով, քրեական գործ է հարուցվել Արծվիկ Մինասյանի եւ «Պատիվ ունեմ» խմբակցության պատգամավոր Տարոն Մարգարյանի դեմ։
Մինասյանի խոսքով՝ ինքն ու Մարգարյանը կասկածվում են ընդդիմության հանրահավաքներից մեկի մասնակիցներին գումար բաժանելու մեջ։
«Քրեական գործը հարուցվել է մայիսի 6-ին Արմավիրի մարզում։ Մեզ հայտնեցին, որ, իբր, ես ու Տարոն Մարգարյանը գումար ենք բաժանել ակցիայի մասնակիցներին»,-ասաց Մինասյանը։
Պատգամավորը վստահեցրեց, որ իր եւ իր գործընկերոջ դեմ հարուցված գործը շինծու է։
