Իրանցի գեներալը զգուշացրել է Ադրբեջանին
Իրանի Զինված ուժերի գլխավոր շտաբի պետ Աբդոլրահիմ Մուսավին նախազգուշացրել է իր հյուսիսային հարևան Ադրբեջանին, որը չի հրաժարվում Իրանի սահմանով Հայաստանով միջանցք ստանալու մտքից, գրում է իրանական «Azeriha» թերթը։
«Նրանք, ովքեր հրավիրում են օտարերկրացիներին իրենց անվտանգությունն ապահովելու համար, պետք է իմանան, որ այս բռնատիրական և էքսպանսիոնիստ երկրները փորձում են պաշտպանել իրենց շահերը։ Մեր անցյալը ցույց է տվել, որ մենք ագրեսոր չենք։ Մեր բոլոր զորավարժությունները ուղղված են երկրի պաշտպանությանը։ Բայց թող մեր թշնամիները չսխալվեն։ Նրանք պետք է հասկանան, որ եթե սպառնում են մեր շահերին, մեր պատասխանը չի սահմանափակվի սահմաններով։ Եթե նրանք սպառնում են մեր շահերին, մենք կսպառնանք նրանց շահերին, որտեղ էլ որ նրանք լինեն»,- ասել է բրիգադի գեներալ Մուսավին։
Նա ընդգծել է, որ Իրանը կապահովի տարածաշրջանի երկրների ու իր եղբայրների անվտանգությունը, կպաշտպանի իրեն ու իր ժողովրդին։
Հիշեցնենք, որ Թեհրանը նշել է իր կարմիր գծերը՝ պետական սահմանների անձեռնմխելիությունը՝ դրանով իսկ Բաքվին հասկացնելով, որ միջանցք թույլ չի տա։
