ԿԳՄՍ նախարարությունն անդրդվելի է. փոխում է բուհերի հոգաբարձուների խորհրդի ձևավորման կարգը. «Հրապարակ»

«Հրապարակ» թերթը գրում է. «Չնայած ՀՀ նախագահ Արմեն Սարգսյանը «Բարձրագույն կրթության և գիտության մասին» օրենքով դիմել է ՍԴ, սակայն ԿԳՄՍ նախարարությունը որոշել է չսպասել քննության ավարտին՝ հանրային քննարկման է ներկայացրել կառավարության որոշման նախագիծ, որով փոխում է բուհերի հոգաբարձուների խորհրդի ձևավորման կարգը․ կազմը կրճատում է՝ 32-ից կամ 24-ից դարձնելով 20:

Նոր կարգով՝ խորհրդի 20 հոգանոց կազմի 55%-ին կնշանակի կառավարությունը, ԿԳՄՍՆ-ն՝ 10%, բուհի պրոֆեսորադասախոսական կազմը՝ 10%, ուսանողական կազմը՝ 25%։ Գործող կարգով՝ կառավարության, նախարարության, պրոֆեսորադասախոսական և ուսանողական կազմի ներկայացուցիչները խորհրդում նույն համամասնությամբ էին՝ 25-ական տոկոս։

Փաստորեն, իշխանությունն ամեն գնով որոշել է ոչնչացնել բուհերի ինքնավարությունն ու կառավարելի դարձնել, և այս շտապողականությունը հիմնականում ԵՊՀ-ում ստեղծված վիճակով է պայմանավորված։ ԵՊՀ ռեկտորի պաշտոնակատարն ազատման դիմում է գրել։

Լուծարվել է հոգաբարձուների խորհուրդը: Նոր կարգով իրենց ուզած հոգաբարձուների խորհուրդը կընտրեն և ցանկալի թեկնածուին ռեկտոր կդարձնեն, իսկ երբ ՍԴ-ն այս դրույթը հակասահմանադրական ճանաչի, այն հետադարձ ուժ չի ունենա»:

Առավել մանրամասն կարդացեք թերթի այսօրվա համարում։