Թրամփը Պուտինի հետ հանդիպումից հետո զանգահարել է Ուկրաինայի եվրոպացի դաշնակիցներին․ Bloomberg
ԱՄՆ նախագահ Դոնալդ Թրամփը Ռուսաստանի նախագահ Վլադիմիր Պուտինի հետ հանդիպումից հետո հեռախոսազրույց է ունեցել Ուկրաինային աջակցող եվրոպացի դաշնակիցների հետ՝ նրանց ներկայացնելով բանակցությունների արդյունքները։ Այս մասին հայտնում է Bloomberg գործակալությունը՝ հղում անելով իր աղբյուրներին։
Գործակալության տեղեկություններով՝ Թրամփը «Կամավորների կոալիցիայի» անդամ երկրների առաջնորդներին հայտնել է, որ Ռուսաստանի նախագահի հետ հանդիպումն անցել է դրական մթնոլորտում և կարող է նպաստել Ուկրաինայում խաղաղության հաստատմանն ուղղված ջանքերին։
ԱՄՆ-ի և Ռուսաստանի նախագահների հանդիպումը տեղի է ունեցել Չինաստանի Շենժեն քաղաքում՝ Ասիա-խաղաղօվկիանոսյան տնտեսական համագործակցության (APEC) գագաթնաժողովի շրջանակում։ Քննարկումների առանցքային թեմաներից մեկը եղել է ռուս-ուկրաինական պատերազմի հնարավոր կարգավորումը։
Եվրոպացի առաջնորդներն իրենց հերթին շարունակում են պնդել, որ Ուկրաինայի ապագային վերաբերող ցանկացած համաձայնություն պետք է մշակվի Կիևի անմիջական մասնակցությամբ, իսկ եվրոպական անվտանգության հարցերը՝ եվրոպական երկրների ներգրավմամբ։
Նոյեմբերի 19-ին Բեռլինում տեղի է ունեցել նաև «Կամավորների կոալիցիայի» հանդիպումը, որին մասնակցել են Ուկրաինայի նախագահ Վոլոդիմիր Զելենսկին, եվրոպական երկրների ղեկավարներ և ԱՄՆ նախագահի հատուկ բանագնացներ Սթիվ Ուիթքոֆն ու Ջարեդ Քուշները։
Հանդիպման ընթացքում քննարկվել են Ուկրաինայի համար անվտանգության երաշխիքների ապահովման, խաղաղության բանակցություններում Եվրոպայի մասնակցության և պատերազմի ավարտին ուղղված հետագա դիվանագիտական քայլերի հարցերը։

