ՀԱՊԿ-ում կարող են քննարկել Կանոնադրության 25-րդ հոդվածը Հայաստանի նկատմամբ կիրառելու հարցը. գլխավոր քարտուղար
ՀԱՊԿ-ի կոլեկտիվ անվտանգության խորհուրդը կարող է քննարկել կազմակերպության կանոնադրության 25-րդ հոդվածը Հայաստանի նկատմամբ կիրառելու հարցը: Այս մասին Եվրասիական անվտանգության հարցերով Մինսկի IV միջազգային համաժողովում լրագրողներին ասել է ՀԱՊԿ-ի գլխավոր քարտուղար Թալաթբեկ Մասադիկովը։
ՀԱՊԿ կանոնադրության 25-րդ հոդվածը սահմանում է. «Եթե անդամ պետությունները երկու տարվա ընթացքում չկատարեն Կազմակերպության բյուջեի նկատմամբ իրենց պարտքը մարելու պարտավորությունները, Խորհուրդը որոշում է կայացնում կասեցնել այդ պետության քաղաքացիներին Կազմակերպության շրջանակներում քվոտային պաշտոններ առաջադրելու իրավունքը, ինչպես նաև զրկել նրանց Կազմակերպության մարմիններում քվեարկելու իրավունքից մինչև պարտքի լրիվ մարումը»։
Թալաթբեկ Մասադիկովը նշել է, որ Երևանն արդեն երեք տարի ակտիվորեն չի մասնակցում ՀԱՊԿ-ի աշխատանքներին, բայց մասնակցում է մշտական ներկայացուցիչների բոլոր շաբաթական նիստերին։ ՀԱՊԿ գլխավոր քարտուղարը հավելել է, որ մասնակցելու կամ չմասնակցելու որոշումը մնում է երկրին, այսինքն՝ Հայաստանի կառավարությանը և ժողովրդին։
«Այս տարի, եթե օրակարգը հաստատվի, նոյեմբերի 10-ին հարցը կքննարկվի Հավաքական անվտանգության խորհրդում», – բացատրել է ՀԱՊԿ գլխավոր քարտուղարը։
Նրա խոսքով, Ռուսաստանի Դաշնությունն արդեն ունի Հայաստանի վերաբերյալ որոշման նախագիծ։
«Սա վերաբերում է անդամավճարներին և վերջին երկու տարիների ընթացքում չմասնակցելուն, որն այժմ արդեն երրորդ տարին է… Ներկայություն, բայց աշխատանքին չմասնակցել», – հավելել է Մասադիկովը։
Նա պարզաբանել է, որ ներկայումս Հայաստանին կազմակերպությունից հեռացնելու խոսք չկա։
«Ոչ, նման բան չկա։ ՀԱՊԿ կանոնադրության 25-րդ հոդվածի կիրառումը Հայաստանի նկատմամբ»,- պատասխանել է նա ճշտող հարցին։
Ավելի վաղ ՀՀ արտաքին գործերի նախարար արարատ Միրզոյանը հայտարարել էր, որ Երևանը Հավաքական անվտանգության պայմանագրի կազմակերպություն վերադառնալու հնարավորություն չի տեսնում։
