Բաքուն և Անկարան ծանր են տարել Իսրայելի կողմից Հայոց ցեղաuպանnւթյnւնը ճանաչող բանաձևի ընդունումը
Թուրքիայի արտաքին գործերի նախարարությունը դատապարտել է Իսրայելի կողմից Հայոց ցեղասպանությունը ճանաչելու որոշումը՝ այն անվանելով քաղաքական դրդապատճառներ ունեցող և Գազայի հատվածում տեղի ունեցած ցեղասպանությունը թաքցնելու փորձ։ Այս մասին փոխանցում է ՏԱՍՍ-ը։
«Իսրայելի կառավարությունը, որը աշխարհի առջև համակարգված կերպով հետապնդում է պաղեստինցի ժողովրդին և Գազայի ժողովրդի ցեղասպանության համար դատի է ենթարկվում Միջազգային քրեական դատարանում [ՄՔԴ], փորձում է թաքցնել իր սեփական հանցագործությունները՝ 1915 թվականի իրադարձությունների վերաբերյալ քաղաքական դրդապատճառներով որոշում կայացնելով»,-ասվում է թուրքական դիվանագիտական առաքելության հայտարարության մեջ։
Այն նշում է, որ Իսրայելի իշխանությունների որոշումը, որը «անտեսում է պատմական փաստերը», «ընդգծում է վարչապետ Բենիամին Նեթանյահուի և նրա հանցակիցների ծանր վիճակը, որոնց համար Միջազգային քրեական դատարանը ձերբակալման օրդեր է տվել պաղեստինցիների դեմ կատարված հանցագործությունների հետաքննության կապակցությամբ»։
«Թուրքիան կշարունակի վճռականորեն աշխատել՝ վերջ դնելու Իսրայելի էքսպանսիոնիստական և անկայունացնող քաղաքականությանը տարածաշրջանում և պատասխանատվության ենթարկելու Նեթանյահուի կառավարությանը քաղաքացիական բնակչության, մասնավորապես՝ պաղեստինյան ժողովրդի դեմ կատարված հանցագործությունների համար»,-ավելացվում է հայտարարության մեջ։
Իսկ Ադրբեջանի ԱԳՆ-ն Իսրայելի կառավարությանը կոչ է արել վերանայել Հայոց ցեղասպանության մասին որոշումը: Այս մասին հայտնում են ադրբեջանական ԶԼՄ-ները:
Մասնավորապես նշվում է, որ 1915 թվականի իրադարձությունների վերաբերյալ «պատմական ճշմարտության խեղաթյուրումը, բարդ պատմական գործընթացները իրավական և գիտական հիմքերից հեռու քաղաքական որոշման առարկա դարձնելն անընդունելի է»:
«Նման քայլերը ծառայում են ոչ թե հաշտեցմանն ու փոխըմբռնմանը, այլ գոյություն ունեցող հակասությունների հետագա խորացմանը, խոչընդոտում են տարածաշրջանում կայուն խաղաղության և հաշտեցման ապահովման ջանքերին։
Մենք Իսրայելի կառավարությանը կոչ ենք անում վերանայել իր ընդունած որոշումը։
Ադրբեջանը նույնպես հետայսու հետևողականորեն շարունակելու է իր դիրքորոշումը՝ պատմական ճշմարտության պաշտպանության, միջազգային իրավունքի սկզբունքների հարգման և տարածաշրջանում կայուն խաղաղությանը նպաստելու ուղղությամբ», – ասված է ԱԳՆ-ի հաղորդագրության մեջ։
Հիշեցնենք, որ Իսրայելի կառավարությունը միաձայն ճանաչել է Հայոց ցեղաuպանությունը։
