Գագիկ Ծառուկյանի տանը զննություն են իրականացնում

Գագիկ Ծառուկյանի տանը զննություն է իրականացվում փորձագետների միջոցով։ Քրեական վարույթն առհասարակ կապ չունի Գագիկ Ծառուկյանի հետ։ Այս մասին ԶԼՄ-ներին հայտնել է Ծառուկյանի փաստաբան Էմին Խաչատրյանը։

Նրա խոսքով, քրեական գործը հարուցված է եղել դեռևս 2020 թվականին՝ Առինջ համայնքի նախկին պաշտոնատար անձանց վերաբերյալ։ Փաստաբանը նշեց, որ այդ գործի շրջանակներում անհրաժեշտություն է առաջացել տարբեր հողատարածքներ զննելու, այդ թվում՝ Գագիկ Ծառուկյանին պատկանող հողատարածքը։

Գագիկ Ծառուկյանն այս վարույթով հարցաքննվել է դեռևս 2020 թվականին՝ վկայի կարգավիճակով, դրանից հետո որևէ քննչական գործողություն տեղի չի ունեցել՝ Գագիկ Ծառուկյանի վերաբերյալ կամ նրա մասնակցությամբ։ 
Հիշեցնենք, որ 2020-ին ՔԿ-ն հայտնել էր՝ Կոտայքի մարզի Առինջ համայնքի ղեկավարին մեղադրանք է առաջադրվել ՀՀ քրեական օրենսգրքի 308-րդ հոդվածի (պաշտոնեական լիազորությունները չարաշահելը)  2-րդ մասով նախատեսված արարքներ առերևույթ կատարելու համար։
Եվ ահա մոտ 6 տարի առաջ հարուցված քրեական գործի շրջանակում քննչական գործողությունները «վերակենդանացան», երբ փետրվարի 10-ին պարզվեց, որ Գագիկ Ծառուկյանը մասնակցելու է հերթական խորհրդարանական ընտրություններին։