Իրանի և Ադրբեջանի նախագահները հեռախոսազրույց են ունեցել
Իրանի և Ադրբեջանի նախագահներ Մասուդ Փեզեշքիանը և Իլհամ Ալիևը հեռախոսազրույց են ունեցել: Report-ի փոխանցմամբ՝ հղում անելով Ադրբեջանի ղեկավարի մամուլի ծառայությանը, Իրանի նախագահը շնորհավորել է Ալիևին առաջիկա սուրբ Կուրբան Բայրամի կապակցությամբ: Նախագահ Իլհամ Ալիևը, իր հերթին, շնորհավորել է նախագահին, Իրանի եղբայրական և բարեկամ ժողովրդին՝ Կուրբան Բայրամի կապակցությամբ և մաղթել նրանց բարգավաճում և առաջընթաց:
«Հեռախոսազրույցի ընթացքում ընդգծվել է, որ ներկայումս երկու երկրների համապատասխան պետական մարմինները շարունակում են ջանքեր գործադրել Մասուդ Փեզեշքիանի Ադրբեջան կատարած պաշտոնական այցի ընթացքում սահմանված խնդիրները կատարելու համար: Այցի արդյունքում նշվել է Բաքու-Թավրիզ չվերթի վերականգնումը և Բաքու-Թեհրան երթուղով չվերթների թվի ավելացումը, վստահություն է հայտնվել, որ դա դրական ազդեցություն կունենա ժողովուրդների միջև շփումների ակտիվացման վրա:
Ընդգծվել է, որ ադրբեջանա-իրանական հարաբերությունների զարգացումը շրջադարձային կետի է հասել, և հույս է հայտնվել, որ համատեղ ջանքերի շնորհիվ երկրների միջև տարբեր ոլորտներում հարաբերությունները դինամիկ կզարգանան», – մեջբերում է հրատարակությունը:
