«Գութանն» այս տարի անցկացվելու է Գաֆէսճեան քանդակների պարտեզում
«Գութան» Հայաստանի ազգային-ավանդական երգի-պարի ամենամյա փառատոնը, որն իրականացնում է «Մրրո» հայ ազգային արվեստի կենտրոնը, այս տարի տոնում է հոբելյանական 10-ամյակը: Փառատոնի հիմնադիր-ղեկավար, ՀՀ վաստակավոր արտիստ Արսեն Գրիգորյանի երազանքն է եղել, ստեղծել այնպիսի փառատոն, որը կմեկտեղի Հայկական ազգային, ավանդական երգի-պարի խմբերին: Եվ ահա, արդեն 10 տարի է նրա երազանքն իրականություն է: Փառատոնին մասնակցում են ավանդական երգ ու պարի լավագույն խմբերը, յուրաքանչյուր տարի շուրջ 20 խումբ` թվով 400 և ավելի մասնակից-արտիստ ելույթ են ունենում «Գութանի» բեմում: Փառատոնի յուրահատկություններից է բացումը, որի ընթացքում բոլոր խմբերը միասին ելույթ են ունենում միասնական երգով. այդ մոգական պահին, երբ մոտ 400 արտիստ բեմում է` իրենց տարազներով, բեմը ստանում է հայկական գորգի պատկեր, հյուսված միասնական ուժով: Այս տարի փառատոնի մասնակից խմբերն են` «Ակունք», «Կարին», «Սասնա Ծռեր», «Վան», «Տարոնցիներ», «Նուբար»,«Վերադարձ», «Մասունք», «Տավրոս»/Մասիս/, «Գորանի», «Արեգ», «Սեբաստացիներ», «Մարաթուկցիներ», «Արդվին», «Ծիլք», «Ծովակ», Արցախի «Մենք ենք մեր սարերը»: Յուրաքանչյուր տարի «Գութան» փառատոնը համալրվում է նոր մասնակից խմբերով: Այս տարի Գութանի բեմում առաջին անգամ ելույթ է ունենալու «Ծովակ» խումբը: Ինչո՞ւ «Գութան». հիմնադիր-ղեկավար Արսեն Գրիգորյանը երկար չի մտածել, քանի որ նրա խոսքով գութանը արարման գործիք է և անմիջական կապ ունի մեր արարող տեսակի հետ: Եվ պատահական չէ, որ Գութաներգերը մեծ տեղ են գրավում մեր ազգային երգարվեստում: Ահա այս ամենից ելնելով Փառատոնը ստացավ իր անվանումը` «Գութան»: Ինչպես գութանն է հողը հերկում` բարիք ստեղծելու համար, այնպես էլ փառատոնը՝ ազգային մշակույթի պահպանման և շարունակման համար: Փառատոնի նպատակն է պահպանել և տարածել հայկական ազգային-ավանդական երգերն ու պարերը, այն ավելի ճանաչելի դարձնել երիտասարդներին ու փոխանցել սերնդեսերունդ: Փառատոնն առաջնորդվում է կարևորագույն սկզբունքներով. ավանդական երգերի-պարերի ներկայացում իրենց էթնիկ տարբերակով՝ առանց որևէ ժամանակակից մշակումների: Փառատոնի սկզբունքներից է նաև օգտագործել բացառապես ազգային նվագարաններ` դուդուկ, բլուլ, շվի, զուռնա, պկու, կոպալ, դհոլ և այլն: «Գութանի» նպատակն է նպաստել, ներդրում ունենալ հայկական ազգային հնչերանգի ու ձայներանգի պահպանման կարևոր գործում: «Գութան» փառատոնի ընթացքում ցուցադրվում են կարճամետրաժ տեսաֆիլմեր` հայ երգի ու պարի երախտավորների գործունեությանը նվիրված: Սա ևս փառատոնի որդեգրած սկզբունքներից է` արժևորելով նրանց գործունեությունն ու մեզ փոխանցված ավանդը: «Գութան» Հայաստանի ազգային-ավանդական երգի-պարի ամենամյա փառատոնն այս տարիներին անցկացվել է Երևանում, Տավուշում և Արցախում: Փառատոնը մշտապես տեղի է ունենում բացօթյա։
Այս տարի այն անցկացվելու է Երևանում, օգոստոսի 31-ին, ժամը 19։00, Գաֆէսճեան քանդակների պարտեզում (Կասկադ):
