Դա զիջախաղ է ռուսների հետ․ Կուլեբան բացասաբար է արձագանքել Թուրքիայի առաջարկին
Ուկրաինայի ԱԳՆ-ը բացասաբար է արձագանքել Կախովկայի ՀԷԿ-ի պայթեցման հետաքննության համար միջազգային հանձնաժողով ստեղծելու Թուրքիայի առաջարկին։
Այս մասին ասել է արտաքին գործերի նախարար Դմիտրի Կուլեբան հեռուստամարաթոնի եթերում։
«Մենք այդ փորձն արդեն ունենք։ Դա զիջախաղ է ռուսների հետ։ Երբ Ելենովկայում սպանեցին մեր ռազմագերիներին, մենք ՄԱԿ-ին ասացինք՝ ձեր առաքելությունն ուղարկեք, հետաքննեք։ Դուք կարծում եք՝ նրանք այնտեղ հասա՞ն։ Ես ձեզ ավելին ասեմ. այդ առաքելությունը սուսուփուս փակվեց ՄԱԿ-ի կողմից, ինչպես ասում են՝ անաղմուկ»,- ասել է նախարարը։
Միևնույն ժամանակ, նա առաջարկել է միջազգային կառույցներին գալ Կիև և հետաքննել Ուկրաինայի մայրաքաղաքի մշտական գրոհները։
