Ենթադրյալ հանցագործության դեպքը գտնվում է ՀՀ իրավապահ մարմինների իրավասության տիրույթում. ԱՀ դատախազություն
ԱՀ դատախազությունը պարզաբանում է տարածել զանգվածային լրատվության միջոցներով հրապարակված տեղեկատվության շուրջ:
Գերատեսչության լրատվական ծառայության փոխանցմամբ՝ ՀՀ Երևան քաղաքի Ազատության հրապարակում մայիսի 25-ին տեղի ունեցած հավաքի ընթացքում հավաքի մասնակից Ջիվան Աբրահամյանի կողմից սպառնալիք պարունակող հայտարարություններ էին արվել Արցախի Հանրապետության նախագահի հասցեին: Հայաստանի Հանրապետության ոստիկանության կողմից տարածված տեղեկատվության համաձայն` Ջ. Աբրահամյանը բերման էր ենթարկվել ոստիկանության կենտրոնական բաժին, հիշյալ հայտարարություններում հանցագործության հատկանիշների առկայությունը պարզելու նպատակով ոստիկանության կողմից ձեռնարկվում են քրեադատավարական միջոցառումներ:
Նկատի ունենալով, որ առերևույթ հանցագործության հատկանիշներ պարունակող ենթադրյալ հանցագործության դեպքը տեղի է ունեցել Հայաստանի Հանրապետությունում, ուստի այն գտնվում է ՀՀ իրավապահ մարմինների իրավասության տիրույթում, և դրան արձագանքելու հնարավորությունն ու քրեադատավարական միջոցառումներ կատարելու իրավասությունը ևս պատկանում է նրանց:
