Վրացական կողմը հրաժարվել է քննարկել Ամերիկայի հետ ռազմավարական գործընկերության հետ կապված հարցերը. ԱՄՆ դեսպան
«Վերջերս մենք Վրաստանի կառավարության բարձրաստիճան պաշտոնյաներին հրավիրեցինք ԱՄՆ բարձրաստիճան պաշտոնյաների հետ քննարկելու ռազմավարական գործընկերության և ամերիկյան աջակցության ցանկացած հարց: Ցավոք, վրացական կողմը նախընտրեց մերժել այս հրավերը»,- հայտարարել է Վրաստանում ԱՄՆ դեսպան Ռոբին Դաննիգանը։
Դաննիգանի հայտարարությունը հրապարակվել է ԱՄՆ դեսպանատան պաշտոնական կայքում։
Դեսպանի խոսքով` ԱՄՆ-ը կոչ է անում Վրաստանի կառավարությանը վերահաստատել իր հավատարմությունը եվրատլանտյան ապագային, ինչպես գրված է երկրի Սահմանադրության մեջ:
Դաննիգանը խոր մտահոգություն է հայտնել վրացական կառավարության ընտրության վերաբերյալ, որը երկիրը հեռացրել է եվրատլանտյան ապագայից՝ նկատի ունենալով օտարերկրյա գործակալների մասին վիճահարույց օրենքի վերաներկայացումը, որը լայնամասշտաբ բողոքի ցույցերի պատճառ դարձավ:
