Որքան նման են իրար այս երկու ճիվաղներն իրենց հրեշավոր կեղծավորությամբ

«Իսրայելը և ՑԱՀԱԼ- ը (Իսրայելի պաշտպանության բանակը.- Ա.Հ.) գործում են միջազգային իրավունքի բարձրագույն չափանիշներին համապատասխան, որպեսզի կանխեն ոչ մասնակցին (հակամարտությանը չմասնակցող խաղաղ բնակչությանը) վնաս հասցնելը, և մենք կշարունակենք դա անել մինչև հաղթանակ» – անցած կիրակի, ТАСС- ի փոխանցմամբ , ասել է Իսրայելի վարչապետ Բենիամին Նաթանյահուն:

Ինչպես արդեն նշել ենք, Իսրայելը տարածելով այն կեղծիքը, թե պահպանում է «պատերազմի օրենքները» և գործում է միջազգային իրավունքի բարձրագույն չափանիշներին համապատասխան, ըստ էության, զբաղվում է Պաղեստինի արաբների վատ սքողված ցեղասպանությամբ: Հրեական պետության ղեկավարի հրեշավոր կեղծավորությունը բացահայտվում է բազմաթիվ փաստերով, որոնց հնարավորինս համառոտ և ոչ ամբողջական շարադրանքը կներկայացնենք ստորև: Եվ, ուրեմն, ի՞նչ են վկայում փաստերը…

Իսրայելական զորքերը մտադիր են Գազայի հատվածում ճապոնական Հիրոսիմա քաղաքի ավերածությունների նմանությունը կազմակերպել՝ միայն առանց միջուկային զենքի. այս մասին դեռ հոկտեմբերի կեսերին հայտնել Է ամերիկացի հայտնի լրագրող Սեյմուր Հերշը՝ հղում անելով իր աղբյուրներին:

«Գազա քաղաքը գտնվում է Հիրոսիմայի վերածվելու գործընթացում՝ առանց միջուկային զենքի օգտագործման»,- «РИА Новости»– ի տեղեկացմամբ , իր զրուցակցի խոսքերն է մեջբերել ՑԱՀԱԼ- ի ծրագրերին ծանոթ հետաքննող լրագրողը:

ՄԱԿ- ի հինգ գործակալություններ հոկտեմբերի 21- ի համատեղ հայտարարության մեջ Գազայի հատվածում ստեղծված իրավիճակը գնահատել են որպես աղետալի  և կոչ են արել մարդասիրական հրադադար հաստատել, ինչից, ի դեպ, Իսրայելի սիոնիստական վարչակարգն առ այսօր հրաժարվում է:

«Գազայի անդադար իսրայելական ռմբակոծությունները, որոնք սաստկացել են անցած գիշեր, կրկին թիրախավորել են կանանց, երեխաներին և անմեղ խաղաղ բնակիչներին՝ խորացնելով հումանիտար ճգնաժամը,- հոկտեմբերի 28- ին, «РИА Новости»– ի տեղեկացմամբ, գրել է Թուրքիայի նախագահ Ռեջեփ Թայիփ Էրդողանը X սոցիալական ցանցում  (նախկինում ՝ Twitter):- Իսրայելը պետք է անհապաղ դուրս գա այս խելագարության վիճակից և դադարեցնի իր հարձակումները»:

Դեռ հոկտեմբերի վերջին նշելով, որ «Գազայում անվտանգ տեղեր չկան», պաղեստինցի փախստականների օգնության և աշխատանքների կազմակերպման ՄԱԿ-ի մերձավորարևելյան գործակալության գլխավոր հանձնակատար Ֆիլիպ Լազարինին ՄԱԿ-ի Անվտանգության խորհրդի նիստում, «Коммерсантъ»– ի փոխանցմամբ, հայտարարել է (Լազարինիի ելույթը հեռարձակվել Է ՄԱԿ-ի կայքում).

«Ըստ տեղեկությունների, սպանվածների 70 տոկոսը երեխաներ և կանայք են։ «Save the Children» կազմակերպությունը երեկ հայտնել է, որ Գազայում ընդամենը երեք շաբաթվա ընթացքում սպանվել է գրեթե 3200 երեխա: Սա գերազանցում է 2019 թվականից սկսած, համաշխարհային հակամարտությունների գոտիներում ամեն տարի սպանված երեխաների թիվը։ Դա չի կարող լինել ուղեկցող կորուստ: Եկեղեցիներ, մզկիթներ, հիվանդանոցներ, ԲԱՊՈՐ… նրանց չեն խնայել, չափազանց շատ մարդիկ սպանվեցին անվտանգության որոնումներում: Գազայի ներկայիս պաշարումը հավաքական պատիժ է» (ընդգծումը՝ մերը)։

Եթե վիրավորված երեխաներին էլ նկատի ունենանք, կառերեսվենք էլ ավելի ահավոր պատկերի: Ինչպես Ժնևում կայացած համատեղ ճեպազրույցում հայտարարել են ՄԱԿ-ի մանկական հիմնադրամի մամուլի քարտուղար Ջեյմս Էլդերը և հումանիտար հարցերի համակարգման վարչության ներկայացուցիչ Յենս Լաերկեն, Գազայի հատվածում հակամարտության սրումից երեք շաբաթվա ընթացքում սպանվել և վիրավորվել են ավելի քան 10 հազար երեխա:

«Այդ թիվն ամեն օր զգալիորեն ավելանում է,- Դեռ հոկտեմբերի 31- ին, «РИА Новости»– ի տեղեկացմամբ , ասել է Էլդերը:- Գազան վերածվել է երեխաների համար գերեզմանոցի։ Դա դժոխք է բոլորի համար: Այնուամենայնիվ, երեխաներին սպառնացող վտանգները դուրս են գալիս ռումբերից և ականանետերից»:

Ընդամենը 1 շաբաթ հետո Գազայի հատվածում սպանված պաղեստիցի երեխաների թվաքանակն աճել է մոտ 1000- ով: Հոկտեմբերի 7- ից Գազայի հատվածում զոհվել է ավելի քան 10 022 պաղեստինցի, որոնցից 4104- ը՝ երեխաներ: Նոյեմբերի 6- ին «Ведомости»– ի փոխանցմամբ, այս մասին հայտնել է «Al Jazeera» հեռուստաալիքը՝ վկայակոչելով անկլավի առողջապահության նախարարությանը: Բացի վերոնշյալ 10 022- ից, 152 հոգի սպանվել է Արևմտյան ափին։

Մինչ այդ, հոկտեմբերի վերջին, ТАСС- ի փոխանցմամբ, Պաղեստինի օկուպացված տարածքներում Առողջապահության համաշխարհային կազմակերպության (ԱՀԿ) ստորաբաժանումը, X սոցիալական ցանցում կազմակերպության էջում հայտնել էր, որ Գազայում «անընդհատ ինտենսիվ ռմբակոծություններ են ընթանում, բազմաթիվ բժշկական հաստատություններ ավերվել են ավիահարվածների հետևանքով»,  «Հիվանդանոցները լեփ-լեցուն են ծանր վնասվածքներով հիվանդներով, և զոհերի ներհոսքի վերջը չի երևում: Դեղորայքի պաշարները սպառվում են, և վառելիքի հետ կապված խափանումներն արդեն ազդում են բժշկական հաստատությունների և շտապօգնության մեքենաների աշխատանքի վրա»։ Ավելի վաղ ԱՀԿ-ն հայտնել էր, որ դեղորայքի պակասի պատճառով Գազայի հատվածում վիրավորների վիրահատություններն իրականացնում են առանց անզգայացման:

 

Շարունակելի

Արթուր Հովհաննիսյան