Հենց Երևանում պետք է որոշվի Հայաստանի և Արցախի ճակատագիրը. Հայկ Մամիջանյան
Հայաստանի և Լեռնային Ղարաբաղի ճակատագիրը որոշվելու է Երևանում: Այս մասին այսօր՝ օգոստոսի 31-ին, Կենտրոնական ընտրական հանձնաժողովի շենքի մոտ տեղի ունեցած հանրահավաքի ժամանակ հայտարարեց Հայաստանի Հանրապետական կուսակցության անդամ, ԱԺ «Պատիվ ունեմ» խմբակցության ղեկավար Հայկ Մամիջանյանը։
«Սովի, ճնշման, առևանգումների, կյանքի վտանգների, որոշ հակահայրենիք գործիչների հստակ պրոադրբեջանական գործունեության պայմաններում, միևնույն է, հերոսաբար դիմանում են: Ստեփանակերտում ինչ հնարավոր է անել ՀՀ-ի և Արցախի փրկության համար, իրենք անում են: Հերթը մերն է՝ Երևանինն է։ Իրականում հենց այստեղ պետք է որոշվի Հայաստանի և Արցախի ճակատագիրը: Շատ կարևորում եմ, որ մեր քաղաքացիները «ՀայաՔվե» նախաձեռնության հետ կապված մի կարևոր փաստի ուշադրություն դարձնեն:
Այս նախաձեռնությունը պարզապես պատիժ է ավելացնում այն բանի համար, ինչը գրված է մեր Սահմանադրության մեջ: Ինչի համար եմ ես սրան ուշադրություն դարձնում, քանի որ Փաշինյանն այդ իր փոփոխությունների մեջ՝ զինանշան, օրհներգ, արդեն իսկ դաշտ է նետում»,-հայտարարեց ընդդիմադիր պատգամավորը: