Ադրբեջանական տելեգրամ-ալիքները տարածել են Հակարի կամրջից առևանգված 68-ամյա արցախցու լուսանկարը
Ադրբեջանական տելեգրամ-ալիքները տարածել են այսօր Հակարի կամրջից առևանգված Արցախի 68-ամյա քաղաքացի Վագիֆ Խաչատրյանի լուսանկարը։
Ավելի վաղ Արցախի Հանրապետության պետական նախարար Գուրգեն Ներսիսյանը հայտնել էր, որ այսօր ԿԽՄԿ միջոցով բուժման նպատակով Հայաստանի Հանրապետության բուժհաստատություններ տեղափոխվող հիվանդներից Ադրբեջանի կողմից արգելանքի է վերցվել ԱՀ 68-ամյա մի քաղաքացի և անցակետից տեղափոխվել այլ վայր։
Արցախի Հանրապետության Մարդու իրավունքների պաշտպան Գեղամ Ստեփանյանն էլ գրել էր, որ հարազատներից, ԿԽՄԿ-ի ներկայացուցիչներից կամ ռուսական խաղաղապահներից որևէ մեկը առևանգված բուժառուի մոտ չէ, և այս պահին նրա ճակատագիրը անհայտ է։
Ադրբեջանը պաշտոնապես հայտարարեց Արցախի Հանրապետության քաղաքացի Վագիֆ Խաչատրյանի ձերբակալության մասին՝ նշելով, թե, իբր, «Ադրբեջանը 2013 թվականի նոյեմբերի 12-ին միջազգային հետախուզում է հայտարարել Խաչատուրյանի նկատմամբ, դատարանի որոշմամբ խափանման միջոց է ընտրվել կալանավորումը»։
Ըստ ադրբեջանական լրատվամիջոցների, նա իբր մեղադրվում է 1991 թվականին «հանցավոր խումբ ստեղծելու» և Խոջալուի գործողություններին մասնակցելու մեջ:
ՀՀ ՄԻՊ-ն առևանգված 68-ամյա արցախցու հարցով կդիմի միջազգային կազմակերպություններին։